Fekk støtte til å restaurere steinkvelvingsbru – no kan fleire få tilskot

Brua på Oppheim i Voss er frå 1700-talet og var del av den kongelege postvegen mellom Bergen og Oslo. I 2021 måtte brua stengjast for motorisert ferdsle. Då var bogen i ferd med å flate ut, og stein byrja å sige ned fleire stadar.

400 000 kr frå fylkeskommunen

Steinkvelvingsbrua vart så demontert, før ho vart mura opp på ny. Arbeidet vart finansiert som eit spleiselag mellom Voss herad, Norsk Vegmuseum og Vestland fylkeskommune, som løyvde 400 000 kroner frå tilskotsordninga for tekniske og industrielle kulturminne.

Denne ordninga og ni andre tilskotsordningar til å ta vare på kulturminne i fylket har søknadsfrist 1. november. Sjå oversikt over alle her.

Bogen gjekk i lås

Murararbeidet vart gjort av murarar frå Høyer Odda AS hausten 2024. Dei byrja med å merke og plukke ned brua før dei monterte den spesialbygde forskalinga og bygde opp att steinkvelvingsbogen. Då forskalinga vart fjerna, sokk bogen saman og gjekk slik i lås, truleg for eit par hundreår framover.

Desse ti tilskotsordningane har søknadsfrist 1. november

• Tilskot til freda kulturminne i privat eige, kulturmiljø og kulturlandskap - Vestland fylkeskommune
• Driftstilskot til regionale og nasjonale kulturminne i Vestland - Vestland fylkeskommune
• Tilskot til brannsikring av tette trehusmiljø med kulturhistorisk verdi - Vestland fylkeskommune
• Tilskot til tekniske og industrielle kulturminne - Vestland fylkeskommune
• Tilskot til profane (ikkje-kyrkjelege) mellomalderbygg - Vestland fylkeskommune
• Tilskot til sikring, istandsetjing og vedlikehald av freda og verna fartøy - Vestland fylkeskommune
• Tilskot til forvaltning og drift av verna fartøy - SAVOS - Vestland fylkeskommune
• Tilskot til konservering av ruinar frå mellomalderen - Vestland fylkeskommune
• Tilskot til kulturminne på verdsarvlista – Vestnorsk fjordlandskap – delområde Nærøyfjorden - Vestland fylkeskommune
• Tilskot til kulturminne på verdsarvlista – Bryggen - Vestland fylkeskommune