Fagbrev på jobb

• Kandidaten må ha dokumentasjon på minst 12 månader arbeidserfaring i ei 80-100% stilling innanfor det aktuelle lærefaget. For kandidatar som ikkje har hatt stilling i 100 prosent, må ein rekne praksisen om til prosent av ei full stilling. Ei 80% stilling kan godkjennast som fulltidsstilling.
• Personar som har meir enn 48 månader allsidig praksis og ikkje treng 12 eller meir månader med opplæring, blir viste til praksiskandidatordninga (https://www.vestlandfylke.no/utdanning-og-karriere/voksen/fagbrev-som-praksiskandidat/).
• Kandidaten treng ikkje å ha bestått fellesfaga. Dersom kandidaten allereie har fullført fellesfaga, kan det også vere aktuelt med lærekontrakt som gir full opplæring i bedrift (FOB).
• Kandidaten må ha arbeidsavtale som dekkjer hele læretida. For å sikre at organiseringa av opplæringa er eigna til å nå målet om fag- /sveineprøve, bør kandidaten ha arbeidsavtale med minst 50 % stillingsstorleik. Fylkeskommunen avgjer om organiseringa av opplæringa i lys av kandidaten sin stillingsstorleik er eigna til å nå målet om "fag- /sveineprøve".
• Kandidaten må ha fullført grunnskuleopplæring eller vere realkompetansevurdert til å ha bestått grunnskuleopplæring.
• Kandidaten må vere i stand til å gjennomføre opplæringa og fag-/sveineprøva på norsk. Dersom det er tvil om språkdugleik, kan kandidaten bli beden om å gjennomføre språktest.

Det samla kravet til praksis og opplæring tar utgangspunkt i lærefaget si totale opplæringstid. For dei fleste fag er dette 48 månadar (2 år på skule + 2 år opplæring i bedrift). Relevant praksis og vidaregåande skulegang kan gi grunnlag for godskriving på fagbrev på jobb-kontrakten og kortare læretid. Det er ikkje mogleg å teikne fagbrev på jobb-kontrakt med mindre enn 12 månadar opplæringstid.

På bakgrunn av tidlegare arbeidserfaring i faget skal lærebedrifta gjere ei vurdering av kandidaten sin kompetanse og resterande læretid på kontrakten. Fagleg leiar i lærebedrifta skal signere på skjemaet «Intern plan fagbrev på jobb», og her foreslå resterande lengde på opplæringstid. Skjemaet finn de lengre nede på nettsida. Lærebedrifta skal gjere ei individuell vurdering av opplæringstida til den einskilde kandidat. Fylkeskommunen skal godkjenne den tilrådde praksisen, og gjere vedtak om opplæringstid på kontrakten.

I tillegg må arbeidsgivaren dokumentere følgande:
- Kva kompetansemål i lærefaget som arbeidstakaren har oppnådd eller delvis oppnådd
- Kva kompetansemål i lærefaget som arbeidstakaren treng opplæring i
- Kor lang opplæringstid som arbeidstakaren treng for å oppnå kompetansemåla i lærefaget

Slik går ein fram om de har aktuell kandidat for fagbrev på jobb-ordninga:

1. Arbeidsgjevar og kandidat er begge einige om fagbrev på jobb
   Arbeidsgjevar og kandidat må vere einige om at opplæringsordninga er aktuell for begge partar. Dette stadfestar de gjennom at begge signerer den elektroniske søknaden ved innsending med MinID. Godkjend fagleg leiar i lærefaget eller tilsett i samarbeidsorganet logger seg inn i søknadsskjemaet med sin personlege Bank-ID.   
2. Fyll ut og send inn elektronisk innmeldingsskjema til fylkeskommunen.
   Lærebedrift/samarbeidsorganet melder kandidaten inn elektronisk til fylkeskommunen. Det skal vere ein innmelding for kvar kandidat. Innmeldinga skal signerast av både kandidat og godkjend fagleg leiar i lærebedrifta eller dagleg leiar i samarbeidsorganet.

   Innmeldinga skal innehalde følgjande dokument:

• Gyldig og oppdatert arbeidsavtale som viser korrekt startdato og stillingsprosent for arbeidsforhold.
• Dokumentasjon på tidlegare relevant praksis i lærefaget. Dette må vere kopi av attestar frå arbeidsgjevar(ar) som seier noko om innhald i arbeidet og stillingsprosent. Sjå krav til innhald i attest: https://www.vestlandfylke.no/utdanning-og-karriere/voksen/fagbrev-som-praksiskandidat/
• Intern plan for opplæringa. Denne skal innehalde generell beskriving  av arbeidsoppgaver og vise korleis desse er knytt opp til aktuelle kompetansemål i læreplanen. Kvar plan skal ha vere tilpassa den einskilde kandidat. Mal for opplæringsplan finn de nederst på sida.
• Dokumentasjon på vidaregåande skulegang viss denne ikkje er gjennomført i Vestland.

Intern plan for opplæringa.

Bedrifta må vere godkjend lærebedrift. Det er fylkeskommunen som er ansvarleg for å godkjenne lærebedrifter. Les meir om korleis du blir godkjend lærebedrift.

Lærebedrifta får tilskot for kandidaten med fagbrev på jobb-kontrakt. Satsen er den same som for vaksne lærlingar (basis II tilskot). Sjå satsar hos Utdanningsdirektoratet. Kandidat som har teikna fagbrev på jobb-kontrakt får behalde vanleg løn frå arbeidsgjevar.

Sluttar kandidaten, er bedrifta pliktig til å gi fylkeskommunen beskjed om dette. Då skal fagbrev på jobb-kontrakt hevast på lik linje som med lærlingar/lærekandidatar. Bedrifta skal bruke skjema for heving av lærekontrakt.

Opplæringa skal ta utgangspunkt i den ordinære læreplanen for Vg3 i lærefaget. Aktuell læreplan finn de på Utdanningsdirektoratet sine heimesider (Læreplanverket (udir.no). Lærebedrifta skal gi kandidaten opplæring på lik linje med den opplæringa som andre lærlingar i faget får.

Før oppmelding til fagprøve må kandidaten ha bestått ein sentralgitt skriftleg eksamen på Vg3-nivå i lærefaget. I nokre lærefag er det krav om fleire beståtte eksamenar før oppmelding til fagprøve (https://www.vestlandfylke.no/utdanning-og-karriere/privatist/meld-deg-til-privatisteksamen/).