Lyser ut støtte til ladepunkt for elbilar og tunge køyretøy
Vestland fylkeskommune lyser ut over 8,6 millionar kroner i tilskot til ladepunkt for el-køyretøy. Nytt av året er at det òg vert lyst ut midlar til tunge køyretøy. Søknadsfrist er 4. august.
Saka oppsummert
- Vestland fylkeskommune deler ut over 8,6 millionar kroner i støtte til nye ladepunkt for elbilar og tunge el-køyretøy i 2025.
- For hurtiglading av personbilar er det spesielt behov i Stad, ytre Bremanger, Strandebarm og Skånevik.
- For tunge køyretøy er Nordheimsund/Kvam, Mongstad og Øygarden høgt prioritert, og område rundt dei grøne hubane i Vestland.
- Målet er å gjere det lettare å køyre elektrisk i heile fylket – også i distrikta.
- Arbeidet med ladepunkt har gitt resultat for elbilar. No trengs det meir støtte til tunge køyretøy og varebilar.
- Fylket har mål om nullutslepp innan 2030. Ein felles strategi for all ladeinfrastruktur er venta i løpet av året.
– Målet er å styrkje det offentlege ladetilbodet i distrikta, og bidra til at fleire vel elektriske løysingar, også aktørar innan næringstransport og drosjenæring, seier Sigrid Brattabø Handegard, leiar for hovudutval for næring i Vestland fylkeskommune.
8,6 millionar øyremerka ulike føremål
Vestland fylkeskommune har i 2025 sett av:
- 3,39 millionar kroner til hurtiglading for elbilar. Prioriteringa er å betre dekning i distrikta, spesielt i nordlege delen av Vestland. Det er eit hovudfokus på å løyse utfordringar for drosjenæringa.
- 5 millionar kroner til ladeinfrastruktur for tunge køyretøy. Prioriteringa skal vere i områda rundt innfartsårene til byane og sentrale strekningar for å sikre berekraftig verdiskaping. Desse skal ikkje konkurrere med Enova sine prioriterte strekningar.
- 100 000 kroner til normalladarar for drosjar i tidlegare Sogn og Fjordane.
- 200 000 kroner til normalladarar ved reiselivsdestinasjonar.
Viktige prioriteringar i 2025
For hurtiglading av personbilar er det spesielt behov i Stad, ytre Bremanger, Strandebarm og Skånevik. For tunge køyretøy er Nordheimsund/Kvam, Mongstad og Øygarden høgt prioritert, og område rundt dei grøne hubane i Vestland.
– Om vi skal nå klimamåla våre, må det vere mogleg å køyre utsleppsfritt i heile fylket – ikkje berre i byane. I distriktet er det ofte krevjande å få til lønsam drift av hurtigladarar, og då må vi bidra. Med denne ordninga vil vi halde fram med å hjelpe kommunane med å byggje ut fleire ladepunkt der behovet er størst, seier Handegard.
I 2025 vil Vestland fylkeskommune framleis rette inn midlar spesifikt for å løyse utfordringar for drosjenæringa. I år har politikarane også budsjettert med midlar til ladepunkt til tunge køyretøy.
Reduksjon i utslepp frå bilar – auke frå tunge køyretøy
Vestland fylkeskommune vedtatt mål om netto nullutslepp innan 2030, og at transportmiddel skal bli nærmast utsleppsfrie. Det skal leggast til rette for overgang til låg- og nullutslepp for alle transportformer, både på veg, i sjø og innan luftfart. Etablering av tilstrekkeleg med ladepunkt som gjer det attraktivt å velje elektriske køyretøy, gjev fortgang i omstillinga.
Det har vore reduksjon i utslepp frå personbilar, men lite i dei andre kategoriane som buss, tunge køyretøy og varebilar. Utslepp frå tunge køyretøy auka frå 2009 til 2023 medan 94,96 prosent av alle nyregistrerte personbilar i februar 2025 i Vestland var elektriske.
– Dette viser at det å jobbe med tilrettelegging for ladepunkt for personbilar har hatt og har effekt, og at andre kategoriar kan ha større fokus, som varebilar og tunge køyretøy, seier Handegard.
Skal bli éin felles strategi
I 2024 vedtok politikarane «Strategi for ladeinfrastruktur av tunge køyretøy i Vestland. Planen for 2025 er at denne og Strategi for vidare utvikling av hurtigladetilbodet i Vestland skal sjåast i samanheng, og ende opp i ein felles strategi for ladeinfrastruktur i Vestland. Politisk sak om dette kjem i løpet av året.
Slik søkjer du
I hovudsak er det kommunar og private hurtigladeoperatørar som kan søkje.
Her finn du søknadsskjema og meir informasjon om ordninga
Når aktørane har sendt inn søknadar, kjem administrasjonen tilbake med ein ny politisk sak til hovudutval for næring, med forslag til konkret prioritering.
Vil du vite meir?
Les saka PS 42/2025 Føringar for tilskotsordning ladeinfrastruktur for elektriske køyretøy og tunge køyretøy 2025 frå hovudutval for næring 20. mai 2025. Saka vart vedteke utan endringar.