Elise fann dolk frå steinalderen på skuleplassen

– Steinen er ein vakker flintdolk frå yngre steinalder. Det er ein utruleg fin dolk, som er veldig sjeldan å finne, fortel arkeolog Louise Bjerre Petersen i Vestland fylkeskommune.

Skulen gjorde alt rett

Ungane var ute og leika i eit friminutt då Elise fann den spesielle steinen.

– Eg skulle plukke opp ein glasbit, og så låg steinen der. Den var fin, fortel ho.

Lærar Karen Drange skjønte med ein gong at dette var ein ekte gjenstand, og at ho måtte ta kontakt med fylkeskommunen. Skulen leverte dolken raskt inn til Vestland fylkeskommune, og arkeolog Petersen roser skulen for å ha gjort alt rett då den spesielle steinen dukka opp.

– Skulen handterte dette etter boka. Når ein finn ting eller spor etter førhistorisk aktivitet, skal det meldast inn til fylkeskommunen. Vi tek imot gjenstanden og samarbeider deretter med universitetsmuseet om saka vidare, seier ho.

Blir brukt i vidare forsking

Vestland fylkeskommune og Universitetsmuseet har saman undersøkt funnstaden på skuleplassen på Os. Funnstaden vart graven ut for å sjekke om det kunne liggje fleire funn i same område.

– Vi fann verken fleire gjenstandar eller spor etter steinalderen akkurat her, men dolken Elise fann er nokså unik. Han vil bidra til den vidare forskinga på steinalderen på Vestlandet, seier Petersen.

Alle funn i Vestland blir leverte inn til Universitetsmuseet i Bergen. Der blir dei katalogiserte og brukte i forsking og formidling.