Fann gullring frå vikingtida i smykkesamling kjøpt på auksjon
Mari Ingelin Gausvik Heskestad frå Alver kjøpte ei smykkesamling på auksjon. Då samlinga kom i posten pakka ho ut moderne sølvsmykke, gullsmykke, juggel, pynt – og ein fingerring i gull frå yngre jernalder/vikingtid.
– Her har vi ei veldig observant kvinne, som med ein gong såg at dette kunne vere noko svært gamalt. Ho kontakta oss, og vi kunne ganske raskt stadfeste at dette var ein ekte fingerring av gull frå yngre jernalder/vikingtid. Det er funne same typen ring i Noreg tidlegare, men dei er sjeldne, fortel Karoline Hareide Breivik, fungerande seksjonsleiar for kulturarv i Vestland fylkeskommune.
Ho fortel vidare at fylkeskommunen heller ikkje kjenner til at det er funne arkeologiske gjenstandar av denne typen i slike samlingar frå auksjonar tidlegare.
Har truleg tilhøyrt ein mann
Størrelsen på ringen syner at han truleg har tilhøyrt ein mann. Om ringen vart mista, gøymt eller gravlagt saman med mannen, er umogleg å vite.
Vestland fylkeskommune har vore i kontakt med auksjonsforretninga, som ikkje kunne gje noko nærare informasjon om kvar ringen opphavleg er frå. Det einaste dei kunne fortelje var at ringen låg i ei av fleire banankassar, som vart leverte inn til dei sommaren 2021.
Sidan funnstaden ikkje er kjent, har Riksantikvaren bestemt at ringen kan leverast til Universitetsmuseet i Bergen. Alle gjenstandar frå før 1537 er automatisk freda.
Imponerande kunnskapar
På Universitetsmuseet i Bergen er det konstatert at ringen veg heile 10,98 gram. Museet har planar om å stille han ut, men endeleg tidspunkt er endå ikkje avklart.
– Arkeologane her i fylkeskommunen er imponerte over kunnskapen til Mari Ingelin Gausvik Heskestad. Ein må ha kunnskap om emnet for å kjenne att førhistorisk gull. I tillegg kunne ho klassifisere ringen til vikingtid. Vi er glade for at ringen vart levert inn til oss, slik at fagpersonar på museet no kan ta vare på han, seier Breivik.
