Ro- og padleruter i Vestland

Vestland fylkeskommune vil med prosjektet gjere det enklare å finne informasjon om

• kvar det er fint å ro og padle
• kva ferdigheiter du treng for å padle ei rute
• kva tilrettelegging og fasilitetar du finn langs ruta

Godt fylke for padling

Naturen i Vestland nær sagt inviterer til både padling og andre former for umotorisert ferdsle på sjøen. I tillegg til ei lang og variert kystlinje har vi mange vatn og vassdrag som innbyr til spennande ro- og padleopplevingar.

Fleire kommunar og regionale friluftslivsorganisasjonar ønskjer å legge til rette for friluftsliv på sjøen, og er alt i gang med ulike tiltak og prosjekt for roing og padling.

24 fekk tilskot til kartlegging

Fylkeskommunen har sett av pengar til prosjektet, og hausten 2022 blei det lyst ut tilskot til kommunar og friluftsråd som ønskjer å kartlegge ro- og padleruter og gjennomføre tilretteleggingstiltak. 24 av kommunane i Vestland søkte og fekk tilskot til å gjennomføre kartlegging.

Bergen og Omland Friluftsråd og Friluftsrådet Vest koordinerer kartlegginga i medlemskommunane sine.

Tilskot til tilrettelegging

Det å ferdast med robåt og kajakk kan bli både enklare og meir attraktivt med ulike former for tilrettelegging. Det kan til dømes vere brygger, som gjer det lettare å kome seg opp i ein kajakk, eller overnattingstilbod langs ei padlerute.

Vestland fylkeskommune har derfor òg løyvd tilskot til ulik tilrettelegging i tilknyting til ro- og padleruter. Eit døme er padlehukar som Bergen og Omland friluftsråd no er i gang med å byggje.

Vestland kommune ønskjer brei medverknad i prosjektet. Difor oppmodar vi kommunane og friluftsråda som har fått tilskot, til å involvere padleklubbar og andre frivillige lag og organisasjonar med kompetanse og kunnskap om roing og padling.

Lanserer padleapp i 2023

Vestland fylkeskommune samarbeider med Norges Padleforbund om gradering av padlerutene i fylket. Dei kartlagde/graderte padlerutene blir tilgjengeleg i ein landsomfattande padleapp, som kjem i løpet av 2023.