To nye regionale planar: – No kan du vere med og forme framtida til fylket
Kvar skal vi byggje i framtida? Korleis får vi fleire i jobb? To nye planar skal vise retning for utviklinga i Vestland. Vestland fylkeskommune ber både kommunar og innbyggjarar om å engasjere seg, delta i debattane og meine noko no.
– No går startskotet. Det er no kommunar, ungdomsråd, næringsliv, lag, organisasjonar, privatpersonar og alle må kome på bana. Det er tidleg i prosessen, men det er i haust vi legg rammene for planane, og bestemmer kva tema og utfordringar dei skal ta føre seg, seier fylkesordførar Jon Askeland.
Tema med stor politisk og allmenn interesse
Dei to nye planane skal erstatte mange av dei gjeldande planane og strategiane. Regional plan for verdiskaping og kompetanse skal gi overordna rammer, prinsipp og konkrete føringar for utvikling av næringsliv, arbeidsplassar og kompetansefeltet i Vestland. Regional plan for areal og mobilitet skal fastsetje strategiske føringar for utbyggingsmønster, arealforvaltning og transportstruktur i Vestland
Fylkestinget vedtok i desember i fjor Utviklingsplan for Vestland 2024–2028. Det er denne som slår fast at det skal lagast to ny regionale planar.
– Dei to nye, overordna planane skal sjå meir samanheng i utviklinga av fylket, og utfordringane vi møter framover. Med to slike planar vil vi lettare sjå utfordringar og moglegheiter i ein samanheng og ikkje lage for snevre planar, eller planar som ikkje tek nok omsyn til kvarandre. Målet er å forenkle, få betre oversikt og færre motstridande føringar. Vi skal setje ei tydelegare retning, seier fylkesordføraren.
Oppmodar kommunepolitikarar til å engasjere seg
Planprogramma for Regional plan for areal og mobilitet og Regional plan for verdiskaping og kompetanse vart debatterte i fylkesutvalet 21. august. Fylkesordførar Jon Askeland oppmodar no kommunestyra i Vestland til å gjere det same.
Desse planane er styringsverktøy for heile samfunnsutviklinga i Vestland. No håpar eg at kommunepolitikarane i Vestland nyttar sjansen, og seier kva retning dei vil ha. Ved å engasjere seg og kome med innspel no, er ein med heilt frå starten, seier Askeland.
Det er ikkje sjølve planane som er ute på høyring, men planprogramma. Dei viser kva planane skal handle om, korleis arbeidet skal gå føre seg, og kven som skal vere med. Fristen for å kome med høyringsinnspel er 10. oktober. Fylkeskommunen inviterer også til to digitale høyringsmøte 9. september.
Sei meininga di digitalt – og hugs høyringsmøta
Alle som ynskjer, kan meine noko om innhaldet i dei to planprogramma via eit digitalt høyringsskjema. Du kan velje tema du er oppteken av, skrive eit innspel og sende inn. Målet er at folk lett skal kunne engasjere seg.
Meir informasjon om planarbeidet og planprogram, og lenke til skjema for innsending av uttale finn de på nettsidene for dei to planane:
Digitalt høyringsmøte 9. september
Det første møtet er kl. 10–11.30 og er eit politisk høyringsmøte, der politikarar i kommunane vert inviterte. Det andre møtet, kl. 13–15 er eit ope møte, særskilt retta mot kommuneadministrasjon, næringsliv, UoH-sektoren, lag og organisasjonar.
Fylkesordførar Jon Askeland og fylkesdirektør Rune Haugsdal deltek på kvart sitt møte.