Alle kommunane får tilskot til profesjonell kunst og kultur for eldre
Hovudutval for kultur, idrett og inkludering har fordelt til saman 4,9 millionar kroner til Den kulturelle spaserstokken og vil no styrkje ordninga.
Saka oppsummert
Hovudutval for kultur, idrett og inkludering har fordelt 4,9 millionar kroner til kommunane i fylket gjennom Den kulturelle spaserstokken, ei ordning som skal gi profesjonell kunst- og kulturformidling til eldre over 67 år. I år søkte alle dei 43 kommunane i fylket om støtte. Bergen får den største tildelinga med 1,4 millionar kroner, etterfølgd av Øygarden og Alver.
Evalueringa av ordninga viser at ho har stor nytteverdi, men at fleire kommunar ønskjer betre rammer og meir ressursar. Hovudutvalet har derfor vedtatt å styrkje ordninga. Målet er meir kultur til fleire eldre, betre samarbeid mellom kommune og fylke, støtte til frivilligheita og utgreiing av aldersvenleg transport saman med Skyss.
Oppsummeringa er laga av KI-tenesta ChatGPT. Innhaldet er kvalitetssikra av kommunikasjonsseksjonen før publisering.
Tilskotsordninga skal leggje til rette for profesjonell kunst- og kulturformidling til personar frå 67 år og oppover. Det er også eit mål å styrke samarbeid mellom kultursektoren og helse- og omsorgssektoren.
Alle kommunane søkte
I årets utlysing søkte alle dei 43 kommunane i fylket om til saman 7,6 millionar kroner, det er ein auke på 19 prosent samanlikna med i fjor. I fjor var det sju kommunar som ikkje søkte til ordninga.
– Det er svært gledeleg at alle kommunane no har søkt. Det betyr at endå fleire i målgruppa får ta del i kunst- og kulturtilbodet. Den kulturelle spaserstokken legg til rette for møteplassar og bidreg til gode opplevingar. Slik kan vi motverke både utanforskap og einsemd, seier Jacob Nødseth, leiar for hovudutval for kultur, idrett og inkludering.
Bergen kommune får den største tildelinga med 1,4 millionar kroner. Så følgjer Øygarden med 225 900 kr og Alver med 211 300 kr. Her kan du sjå kor mykje kvar kommune får, hovudutvalet vedtok forslaget som står i den politiske saka (pdf).
Kultur i møte med demografiske endringar
På saklista til hovudutvalet i møtet 20. mai stod også ei sak om evaluering og styrking av Den kulturelle spaserstokken. Fylkeskommunen har saman med kommunane evaluert ordninga. Kommunane melder at Den kulturelle spaserstokken blant anna gir viktige erfaringar i møte med demografiske endringar, auka søkjelys på kultur som verkemiddel og betra livskvalitet.
Nokre av hovudfunna i rapporten er at kommunane opplever at ordninga har stor nytteverdi, men at det er for lite midlar til å jobbe så godt som dei ønskjer med ho. Fleire kommunar opplever ramme og kapasitet for tilskotsordninga som avgrensa, når det gjeld til dømes storleik på tilskot, og kor mange i kommunen som jobbar med ordninga. Samarbeidet i kommunane varierer også. Enkelte kommunar fortel om godt samarbeid mellom kultur, helse, pensjonistlag og frivilligheita, medan andre svarer at det er lite kapasitet til samarbeid.
Styrkjer ordninga
Hovudutvalet ønskjer å styrkje ordninga slik at kjem fleire til gode og vedtok fleire endringar.
– Vi vil blant anna at ordninga skal bidra til meir kulturformidling til målgruppa. For å få til det må fylkeskommunen støtte både kommunane og frivilligheita i dette arbeidet. I tillegg vil vi stimulere til utviklingsarbeid mellom kommunane og fylkeskommunen og styrke det regionale leddet med eigne tilskotsordningar, seier hovudutvalsleiar Nødseth.
Hovudutvalet vedtok også blant anna at det skal greiast ut aldersvenleg transport i samarbeid med Skyss.
Her kan du lese heile rapporten om evalueringa av Den kulturelle spaserstokken (pdf).