– Vi skal hindre utanforskap, inkludere og leggje til rette
Gode råd for likestilling var tema då rådet for menneske med nedsett funksjonsevne inviterte til kurs. No kan du sjå kurset i opptak.
– De og vi er folkevalde, og alle folkevalde har viktige oppgåver. Men vi har ei spesiell oppgåve med at vi skal hindre utanforskap, inkludere og leggje til rette. I tillegg skal vi vere med og fjerne barrierar slik at vi har reell likestilling. Det er ei samansett gruppe vi skal ta vare på gjennom råda våre. Det viktige er tilrettelegging, og at folk får bruke evnene sine, sa Trude Brosvik, fylkestingsmedlem og leiar for det fylkeskommunale rådet for menneske med nedsett funksjonsevne (RMNF), då ho ønskte velkomen til kurset for kommunale råd.
RMNF er eit medverknadsorgan i fylkeskommunen. Det har ei rådgjevande rolle i den fylkeskommunale verksemda og har rett til å uttale seg i saker om personar med funksjonsnedsetting.
Praktiske råd og FN-konvensjon
Kurset var eit samarbeid mellom rådet for menneske med nedsett funksjonsevne, FFO (Funksjonshemmedes fellesorganisasjon) og SAFO (Samarbeidsforumet av funksjonshemmedes organisasjoner).
Arne Hansen i Innlandet FFO delte av sine erfaringar frå ulike kommunar. Han hadde ein god og nyttig gjennomgang av korleis råda kan arbeide, kva som finst av lovgrunnlag, i tillegg til at han kom med praktiske tips og råd. Hansen har også laga kurset «Gode råd» som ligg på ffo.no.
Brosvik deltok også sjølv med eit innlegg, og seniorrådgjevar Linn Bylund frå Likestillingssenteret KUN orienterte om FN-konvensjonen om rettar til menneske med nedsett funksjonsevne (CRPD).
Samla deltakarane regionvis
Heile 194 personar frå 34 av kommunane i fylket deltok på kurset 5. april. Dei var samla på ni lokasjonar rundt om fylket og følgde kurset som vart sendt frå Vestlandssalen i Vestlandshuset i Bergen. Deltakarane var samla i Alver, Bergen, Gloppen, Lærdal, Sogndal, Stord, Ullensvang og Voss.
– Vi prøvde oss med ei slik hybridløysing denne gongen for å få med flest mogleg og for å samle deltakarane. No følgde dei kurset ikkje berre kommunevis, men i regionar. Då får dei møtast, bli betre kjende, og det blir enklare å trekkje vekslar på kvarandre ved seinare høve, seier Trude Brosvik, som er fylkestingsmedlem og leiar for det fylkeskommunale rådet for menneske med nedsett funksjonsevne.
Intensiverer arbeidet med universell utforming
Vestland fylkeskommune skal framover intensivere arbeidet med universell utforming, på bakgrunn av eit fylkestingsvedtak frå juni i fjor. Det vart då lagt fram ein tilstandsrapport for fylkeskommunen sitt arbeid med universell utforming, og politikarane bad fylkesdirektøren følgje opp og intensivere arbeidet.
Startskotet for arbeidet gjekk tidlegare i vår, då fylkesdirektøren tok med avdelingsdirektørane i fylkeskommunen på «byvandring med kvit stokk».