Ni nye fylkesvegprosjekt til startlista
Fylkestinget har peika ut fleire større veg- og bruprosjekt og tiltak for mjuke trafikantar som kan startast opp dei næraste åra. Dei tek òg grep for å få meir for pengane i det stramme fylkesvegbudsjettet.
Fylkestinget handsama saka Regional transportplan - investeringar - rullering 2023 i møte 15. juni. RTP-investeringar fastset fylkeskommunen sin portefølje av store prosjekt på fylkesveg og prioritering av desse.
Dei beste prosjekta går vidare
– Fylkesvegane er kvardagsvegane i folks liv og dei er avgjerande for både innbyggjarar og næringsliv rundt om i fylket. Vi har eit svært fylkesvegnett der standarden mange plassar dessverre er altfor dårleg. Derfor vurderer vi dei store vegprosjekta kvart år for å sikre at det er dei beste som blir starta opp. No har vi ei liste med gode, gjennomførbare prosjekt vi kan gå vidare med til endeleg vedtak i desember, seier fylkesordførar Jon Askeland.
Den årlege rulleringa av investeringsprogrammet i Regional transportplan for Vestland 2022–2033, den langsiktige planen for samferdsle i fylket, skal mellom anna sikre at vegprosjekt blir realiserte på ein god måte.
– Ting kan skje undervegs, at prosjekt blir vesentleg dyrare eller at planprosessar ikkje kjem i mål. Da skal nye prosjekt vurderast for oppstart, seier fylkesordførar Askeland.
Ni fylkesvegprosjekt er aktuelle for oppstart i komande økonomiplanperiode 2024–2027:
Med anslått kostnad:
Fv. 560 Hammarsland–Eide, Øygarden, Vegprosjekt, 550–700 mill. kr
Fv. 5184 Grimstadvegen, Bergen, Vegprosjekt, 225–340 mill. kr
Fv. 5402 Bavallsvegen, Voss, Vegprosjekt, 180–280 mill. kr
Fv. 49 Egne hjem, Ullensvang, Mjuke trafikantar, 80–120 mill. kr
Fv. 5704 Brandsøyvegen, Kinn, Mjuke trafikantar, 35–50 mill. kr
Fv. 271 Sjukehusvegen, Lærdal, Mjuke trafikantar, 140–170 mill. kr
Fv. 57 Strandanes–Holmeli, Fjaler, Prioriterte hovudvegar, 120–150 mill. kr
Fv. 5591 Rørdalsfjord bru Solund Bru, 65–80 mill. kr
Fv. 571 Mollandseid bru, Masfjorden Bru, 50–65 mill. kr
To grep for meir for pengane
To viktige grep blir også gjort for å få meir for fylkesvegpengane, og for å nå måla i RTP om å stogge det rekordstore forfallet på fylkesvegane og å klimatilpasse vegnettet.
– Vi vil fjerne dei verste flaskehalsane, betre trafikktryggleiken og gjere kvardagsvegane våre betre rusta for klimaendringane, seier Askeland.
Det skal settast av eigne midlar til mindre punktutbetringar som kan gjerast raskt, og løyvinga skal vere enkel, ubyråkratisk og fleksibel.
Det skal også jobbast vidare med strekningstiltak på dei lågtrafikkerte fylkesvegane, å sjå fleire tiltak på ei strekning under eitt for å jobbe meir effektivt. Desse strekningane skal bli innarbeida i neste rullering av RTP Investeringar.
Rassikring og mjuke trafikantar
Lista over prioriterte rassikringsprosjekt står som vedtatt i 2022, med oppstart av Heilevang i 2024 etter anbodsprosess. Også rassikring av fv. Tokagjelet står med oppstart i første økonomiplanperiode 2024–2027. Eit anna viktig satsingsområde omtalt i RTP-investeringar er mjuke trafikantar.
– Det langsiktige målet er at fleire skal gå, sykle eller nytte kollektivtilbod i fylket, tilbodet for mjuke trafikantar skal betrast. Tre slike prosjekt er på lista for oppstart no, seier Askeland.
Det er planlagd at delar av fv. 271 Sjukehusvegen i Lærdal skal få fortau og to nye bruer, fv. 49 Egne hjem i Ullensvang får 300 meter fortau og gang- og sykkelveg langs fv. 5704 Brandsøyvegen blir vidareført.
Fylkestinget legg RTP-investeringar til grunn for det vidare arbeidet med budsjett 2024 og økonomiplan 2024–2027 fram mot fylkestinget i desember 2023.