Auka bompengar i Førdepakken
Fylkesutvalet tilrår å auke bompengane i Førdepakken. Årsaka er lågare snittakst enn det som vart vedteke i bompengeproposisjonen i Stortinget. Taksten vil auke frå 32 til 38 kroner for bilar og frå 57 til 70 kroner for større køyretøy.
Den auka taksten vil gje 200 millionar kroner meir i inntekter i den gjenståande tida av bompengeinnkrevjing fram til 2028.
– For å kunne gjennomføre flest mogleg av tiltaka i Førdepakken, er det nødvendig å justere takstane, seier fylkesvaraordførar Natalia Golis, som leia møtet i fylkesutvalet 6. juni.
Nullutsleppsbilar
Vidare rår fylkesutvalet til at taksten for nullutsleppsbilar blir auka frå 50 til 70 prosent av grunntaksten. Fylkesutvalet gjev også fullmakt til Ferde om å kunne søke om å justere takstane når det er behov for det.
Bompengeinnkrevjinga starta i oktober 2016. I alle år har gjennomsnittleg inntekt pr. passering vore lågare enn vedtatt. I 2022 var den 16,90 kroner pr. passering i snitt, mot snittakstkravet på 20,66 kroner.
Årsaka er mange fritakspasseringar som følgje av taket på 30 passeringar pr. månad. Elbildelen er på 18,6 prosent og aukande. Dette medverkar og til den låge snitttaksten.
Bypakke
Det regionale bompengeselskapet Ferde har i brev til Sunnfjord kommune og Vestland fylkeskommune bede om å få auke bompengeinntektene. Førdepakken er definert som ei bypakke. Difor må både Sunnfjord kommune og Vestland fylkeskommune gje tilslutnad til ein auke. Også Sunnfjord kommune tilrår å auke elbiltakstane slik fylkesutvalet tilrår. Vegdirektoratet skal avgjere bompengetakstane til slutt.