Startskotet for den største moloen i landet
Fredag 11. mars gjekk startsalven for den nye fiskerihamna i Langevåg på Bømlo. Og med det får Sunnhordland og Vestland den største moloen i Noreg, 500 meter lang og 40 meter djup.
Fylkesordførar Jon Askeland fyrte saman med Bømlo-ordførar Sammy Olsen og ungane Amine Kallevåg og Henrik Kolbjørnsen av førstesalva for bygging av ny hamn. Vestland fylkeskommune investerer 165 millionar kroner i den nye fiskerihamna.
Merkedag på Bømlo
– Dette er ein merkedag for eit etterlengta prosjekt, der vi vert gode saman. Bømlo har lenge hatt eit ønske om å realisere fiskerihamn i Langevåg. Hamna var i statens eige fram til 2020, då fylket fekk tilbod om å overta denne og andre 98 hamner i Vestland som del av regionreforma, seier fylkesordførar Jon Askeland.
Han kallar resten ei eventyrleg historie.
– Vi valde å vere offensive, og såg at dette kunne vere løysinga vi leitte etter for å realisere Bømlo fiskerihamn. Som sagt, så gjort, og resten er ei eventyrleg historie, der ei investorgruppe gjekk saman for å danna eit selskap og bad fylkeskommunen forskottere utbygginga. Eit samla fylkesting sa ja til prosjektet i juni 2020, og det er nok eit godt døme på at vi går raskt frå ord til handling, når vi i dag fyrer av første salve for det som vert Noregs største molo sitt slag, seier fylkesordførar Jon Askeland.
Nytt, stort industriområde
Moloen kjem mellom holmen Store Bleikja og Urdatang på fastlandet. Totalt skal om lag ein million kubikkmeter stein fyllast ut for å byggje moloen, som blir den største i landet i samanhengande utstrekking. Salthella i Austevoll er lenger, men er innom nokre holmar undervegs.
Stein til moloen skal sprengast ut frå området like innanfor, slik at det er blir lagt til rette for eit nytt, stort industriområde på om lag 750 dekar.
– Dette gir rom og moglegheiter for ei fantastisk utvikling av både fiskeriindustrien på Bømlo og anna industri med behov for ei god hamn, seier Jostein
Fjærestad, eigedomsdirektør i Vestland fylkeskommune.
Historie og framtidsplanar
Askeland og Fjærestad deltok på markeringa med startsalutt saman med ei rekke representantar for både næringsliv og kommunar i området. Ståle Vorland, dagleg leiar i Bømlo fiskerihavn, fortalde om historia, status quo og ikkje minst framtidsplanane til hamna. Det var helsing ved fylkesordføraren, Bømlo kommune, Karmsund Hamn og sjøfartsdirektøren.
Vestland fylkeskommune overtok ved årsskiftet 2019/2020 ansvaret for 99 fiskerihamner langs kysten vår. Ansvaret vart overført frå staten ved Kystverket, og var del av regionreforma.