Skal trappe opp utbygging av solceller

Fylkestinget har samrøystes vedteke at handlingsplanen for solceller skal omfatte både eksisterande fylkeskommunale bygningar og dei som er under oppføring. Solcellepanel på parkeringsplassar skal også inngå som tiltak i planen.  

Fylkesdirektøren skal følgje opp og kome attende med forslag om gjennomføring og realisering. 

Fleire tiltak

Det var Noralv Distad (H) som i ein interpellasjon til fylkestinget fremja forslag om solceller som energikjelde på fylkeskommunale bygningar. Han peika på det brutale russiske angrepet på Ukraina som har skapt energikrise i Europa, med store verknader også for Noreg. 

– Situasjonen krev no at det vert sett i verk fleire tiltak: Straumstøtte til hushaldningar og bedrifter, raskare utbygging av meir fornybar energi og energiøkonomisering. 

Handling

Distad peikar på at både nye og eksisterande offentlege og kommersielle bygningar over 250 kvadratmeter innan få år kan få krav om solceller. 

– Tida er inne for handling. Vestland fylkeskommune må sjølvsagt gå inn i eiga verksemd og eigne bygningar, både eksisterande og dei som er under bygging. I tillegg bør ein sjå på tiltak som overbyggmed solcellepanel på eigne parkeringsplassar. Det er ingen grunn til å venta på formell godkjenning av nye direktiv. Situasjonen for energi og klima krev tiltak no, skriv Noralv Distad i interpellasjonen. 

Solcelleanlegg

Som svar på interpellasjonen viste fylkesordførar Jon Askeland til at alle fylkeskommunale nybygg og større ombyggingar dei siste åra er etablert med solcelleanlegg. Følgjande ferdigstilte fylkeskommunale bygg har solcelleanlegg: 

• Fjøs på Sogn jord- og hagebruksskule (Aurland) 
• Arna vgs.
• Åsane vgs. 
• Sogndal vgs. avd Kaupanger/Vitemeir 

Følgjande fylkeskommunale bygg under planlegging og oppføring vil få solcelleanlegg: 

• Fylkeshuset i Bergen 
• Askøy vgs.
• Førde vgs.
• Verkstadsbygget Mo og Øyrane vgs (Førde) 
• Stord vgs.
• Langhaugen vgs.
• Kvam vgs.