Positiv til ishall på Stord
– Vi er positive til at Stord får ishall, seier fylkesvaraordførar Natalia Golis etter at fylkesutvalet har behandla sak om bygging av eit regionanlegg for vinteridrett på is på Vikahaugane.
Stord kommune og Stord Idrettslag har søkt Vestland fylkeskommune om eit tilskot på 15 millionar kroner til bygging av ishallen. Den har ein kalkulert total kostnad på 86,5 millionar kroner.
Attraktivt
– Vi ser at det er eit stort behov for meir attraktive og tilrettelagte anlegg både for ulike skøyteidrettar og for eigenorganisert aktivitet på is i fylket. Dette kan bidra til auka fysisk aktivitet og betre folkehelse. Eventuelt fylkeskommunalt tilskot skal vi kome attende til i framtidige budsjett, seier fylkesvaraordførar Natalia Golis, som var møteleiar.
Vedtaket i fylkesutvalet er samrøystes.
Rundbane
Ishallen er planlagt på Vikahaugane i området til Stord idrettspark. Planen er å bygge hall over den eksisterande isbana. Den skal innehalde ei rundbane på 250 meter, ishockeybane og curlingsbane.
Stord Idrettslag har sidan tidleg på 2000-talet jobba aktivt med å erstatte eksisterande skøytebane på Vikahaugane med ein ishall. Hallen kan brukast heile året. Om sommaren blir allsidige is- og vinteraktivitetar erstatta med sommaraktivitetar på rulleskøyter og kunstgras.
Forprosjekt
Forprosjektet for ishallen utarbeidde Stord Idrettslag hausten 2020. Stord kommune og Stord Idrettslag har samarbeidd om å vidareføre forprosjektet til detaljprosjekt og anbodskonkurranse. Dei har som mål at anbodskonkurranse og kontrahering av entreprenør blir gjennomført denne hausten, med byggjestart tidleg neste vår.
Ishallen er planlagt finansiert gjennom støtte frå Stord kommune, Vestland fylkeskommune, lokalt næringsliv og spelemidlar.