Planlegg hurtigbåt Bergen – Ålesund
– Dette vil opne for eit raskare og betre samband langs kysten, seier fylkesordførar Jon Askeland etter at fylkesutvalet har vedteke å greie ut ei ny hurtigbåtrute mellom Bergen og Ålesund når Stad skipstunnel opnar.
Den nye tunnelen har byggestart neste år og skal opne i 2026/27. Det er staten gjennom Kystverket som finansierer og bygger den 1,7 kilometer lange tunnelen. Utgreiinga framover av hurtigbåtsambandet er eit felles prosjekt mellom Vestland og Møre og Romsdal fylkeskommunar.
Stabilt samband langs verhard kyst
– Det nye sambandet vil gjere det enklare og lettare å reise mellom Bergen og Ålesund. Den nye tunnelen vil og medverke til at vi kan få eit stabilt samband langs den verharde kysten ved Stad. Dette er positivt. Ei slik rute kan medverke til å oppretthalde og auke busetnaden langs kysten, og vi kan utvikla ein bu- og arbeidsregion, seier fylkesordførar Jon Askeland.
I dag driv Vestland hurtigbåtrute mellom Bergen og Selje, mens Møre og Romsdal har hurtigbåt mellom Ålesund og Hareid. Eit eventuelt nytt tilbod Florø – Ålesund skal, saman med det etablerte tilbodet Ålesund – Hareid og Bergen – Selje, danne eit tilbod på strekninga Bergen – Ålesund.
Bu- og arbeidsregion
Konsulentselskapet COWI har gjort eit grundig arbeid med å kartlegge marknadspotensiale og effektar eit slikt samband kan ha på utviklinga av bu- og arbeidsregionane. COWI konkluderer med at den største nye transportmarknaden for ruta mellom Bergen og Ålesund ligg på strekninga Florø – Måløy – Ålesund. Det vil vere færre som vil reise heile strekninga mellom Bergen og Ålesund.
Utgreiinga som skal starte no, skal legge fram forslag til eventuelt rutetilbod. Det kan kome til politisk behandling neste vinter. Vedtak om samarbeidsavtale mellom dei to fylka, driftsopplegg og finansiering av ruta, kan bli vedteke i desember 2023, slik at ruta kan bli lyst ut på anbod i 2024. Med ei slik framdrift, kan rutetilbodet vere på plass når tunnelen opnar i 2026/27.