Opprettar aksjeselskap for nye utsleppsfrie hurtigbåtar
– Dette er eit godt steg vidare mot nullutsleppsteknologi på dei lange rutene i Vestland, seier fylkesordførar Jon Askeland. Fylkestinget har vedteke å opprette eit aksjeselskap som skal utvikle og bygge dei nye utsleppsfrie hurtigbåtane.
Aksjeselskapet blir oppretta av dei samarbeidande fylkeskommunane, der Vestland går saman med Trøndelag, Nordland, Troms og Finnmark fylkeskommunar for å utvikle dei nye miljøvennlege hurtigbåtane. Selskapet skal gjennomføre utviklingsprosjektet, skal forenkle ansvarstilhøva mot leverandørane og formalisere eigarskap til hurtigbåtane som skal byggast. I utgangspunktet skal selskapet avviklast når hurtigbåtane er utvikla, pilotert og klare for drift.
Felles eigarselskap
Det vil bli gjort tilsvarande vedtak i alle fire fylkeskommunane, slik at dei kan etablere aksjeselskapet i andre kvartal i år. Fylkesdirektøren skal syte for naudsynt koordinering og avklaring mot dei andre fylkeskommunane for å gjennomføre selskapsetablering. Fylkestinget ber om at eigarselskapet er operativt og i drift innan utgangen av året. Årlege eigarmeldingar for aksjeselskapet skal leggast fram for fylkestinget.
– Fylkeskommunen har i lengre tid satsa stort på å redusere klimautsleppa i fylket. Vi har gjort mykje innan kollektivtrafikken med miljøvennlege bussar, bybane og ferjene. No står hurtigbåtane for tur. Målet vårt er å stimulere marknaden i Noreg til å utvikle meir energieffektive skrog og hydrogen som energiberar på hurtigbåtar. Det vil også bidra til at norsk industri og verftsnæring kan bli verdsleiande på denne typen teknologi, seier fylkesordføraren.
Betydeleg medfinansiering
Dette teknologiutviklingsprosjektet krev betydeleg finansiering for å lukkast. Vestland fylkeskommune har til no brukt 2,5 millionar kroner på å utvikle dei nye hurtigbåtane. Den økonomiske ramma for designfasen er på 86 millionar kroner der Klimasats/Miljødirektoratet har gitt 56 millionar kroner. I tillegg jobbar prosjektet med å få på plass finansiering til bygging av inntil fire hurtigbåtfartøy.
– Når utviklinga er ferdig, må vi ha ei betydeleg medfinansiering frå staten for å bygge dei miljøvennlege hurtigbåtane. I tillegg må fylkeskommunen gje garanti for finansiering for kostnader utover det staten bidreg med, seier fylkesordførar Jon Askeland.
Sak om fylkeskommunale garantiar skal fylkestinget behandle når det er aktuelt.