Klarsignal for vidare finansiering av Askøypakken og Kvinnheradpakken
Stortinget har no sikra finansieringa for ni fylkesvegprosjekt på Askøy og i Kvinnheradspakken. Bompengepakkane vart handsama i Stortinget før påske, og har no fått tilslutning til auka bompengebidrag for å fullføre prosjekta.
Det tyder fem år med bompengar på Askøy, som skal finansiere dei tre attståande fylkesvegprosjekta i pakken. I tillegg kjem det ein ny bomstasjon på Kleppe. Kvinnheradpakken omfattar i alt seks utbyggingsprosjekt og ei ramme til mindre tiltak på fleire fylkesvegstrekningar i Kvinnherad kommune.
– No kan vi endeleg realisere ei rekkje vegstrekningar i dei to kommunane. Vegane her har dårleg standard, og for innbyggarane vil ny veg bety betre framkomst, trafikktryggleik og mindre rasfare. Dette er viktig i kvardagen til folk, seier fylkesordførar Jon Askeland.
Tre fylkesvegprosjekt
Dei tre fylkesvegprosjekta som no blir realiserte på Askøy er
fv. 5246 Slettebrekka–Hetlevik
fv. 562/5266 Fromeide–Kjerrgarden
fv. 5266 Fauskanger sør
To prosjekt er starta opp:
fv. 5240 Skiftesvik–Marikoven
fv. 562 Lavik–Haugland
Det er også sett av ramme til kollektivtiltak på 284 millionar kroner i pakken.
Mindre rasfare
I Kvinnheradpakken er føremålet med dei fleste prosjekta å utbetre standarden på eksisterande veg. Det blir bygging av gang- og sykkelvegar i tettbygde område. For to av dei prioriterte utbyggingsprosjekta er føremålet først og fremst skredsikring.
Det blir òg tatt omsyn til trafikktryggleik og framkome i planlegginga av desse prosjekta. Fv. 500 Furebergfossen bru er allereie ferdig, og den første delen av fv. 500 Folgefonntunnelen–Årsnes er i gang.
Innkrevjing på ferjesamband
Det er lagt opp til at bompengeinnkrevjing i Kvinnheradpakken skal gjerast på ferjesambanda Ranavik–Skjersholmane, Gjermundshamn/Varaldsøy–Årsnes og Skånevik–Utåker/Matre.
Det vil gje låge innkrevjingskostnader, men forslaget kan føre til at ferjetakstane aukar allereie i 2022. Bompengeinnkrevjinga vil etter planen vare i 15 år.