Første byggeplassbesøk etter korona
– Dette gav meirsmak. Elevane har lyst på fleire slike besøk, seier lærar Bjørn Frostad-Solberg etter at elevar ved Slåtthaug videregående skole, før første gong etter nedstenginga, har vore på byggeplassbesøk.
70 elevar i fem klassar var på synfaring og fekk innblikk i byggeprosessen av den første underjordiske haldeplassen på Vestlandet, det nye bybanestoppet på Haukeland. Måndag 21. november blir det sett i drift når Bybanen til Fyllingsdalen opnar.
Elektro og automasjon
Elevane går på vg2 og vg3 elektro og automasjon.
– Vi har vore her fem gonger, med ny klasse kvar gong. Elevane har sett på dei ulike installasjonane som naudlys, ventilasjon, brannventilasjon, køyreleidning og lyssetjing av plattformen. Dei har fått innføring i byggeprosessen, fått omvising på heile haldeplassen og sett korleis den er bygd, seier lærar Frostad-Solberg.
Byggeskikk
Bybanen utbygging inviterte elevar og lærarar ved Slåtthaug videregående skole på omvising på eit anlegg med mange installasjonar som er aktuelt i utdanninga ved skulen og som elevane skal jobbe med når dei kjem ut i arbeidslivet.
– Desse elevane hadde ikkje vore på ein byggeplass før grunna korona. Vi vart kjende med elevar og lærarar og fekk vist byggeskikk, byggemåte og kva elektrofagyrket er i praksis, seier prosjekteringsleiar Per-Arne Skeide i Bybanen utbygging.
Utfordringar
Totalt 70 elevar ved Slåtthaug videregående skole fekk omvising på haldeplassen.
– Vi viste fram modellar og arbeidsunderlag og gav informasjon om spesielle anlegg og utfordringer. Sentrale tema var brannalarm og aspirasjonsanlegg, røykventilasjon, elfordeling, avbrotsfri straumforsyning (UPS) og vern, seier Skeide.
Relevant
Besøket på byggeplassen var veldig nyttig.
– Dette var relevant for elevane og utdanninga. Det er kjekt å sjå dette «live» og ikkje berre som teori. Vi er heldige. Det er kjempekjekt å sjå ein byggeplass på denne måten og korleis dei i praksis bruker det vi underviser i. Det vi har sett i praksis, skal vi gå gjennom i undervisinga på skulen, seier lærar Bjørn Frostad-Solberg.
Svært interessert
Per-Arne Skeide var godt nøgd med besøket.
– Det var ein fin gjeng vi hadde på besøk. Mange var svært interesserte i faget, men dei vart nok overraska over kor fysisk krevjande yrket er. Vi fekk elevane til å løfte kabelkapp på inntil 10 meter som vog 100 kg, for å illustrere utfordringa med kablar. Vi fekk også illustrert og forklart korleis vern og sikring fungerer og avgrensning i høve kabellengder, seier prosjekteringsleiar Per-Arne Skeide i Bybanen utbygging.