Elevar laga Melodi Grand Prix i Bergen
– Det har vore veldig kjekt å treffe norske ungdommar, seier Naomi Abbas frå Frankrike. I ei veke har ho og over 100 andre utanlandske elevar vore i Bergen. Eit høgdepunkt var då dei norske og utanlandske elevane feira den europeiske songkonkurransen Eurovision song contest.
Dei utanlandske elevane er frå sju skular i fire land: Tre klassar frå byane Caen og Granville i Normandie, Frankrike, to klassar frå byane Sevilla, Cadiz og La Union i Spania, og ein klasse frå Tyrkia og ein klasse frå Kroatia. Elevane er gjester på Amalie Skram videregående skole og bur hos dei norske elevane, som er vertsfamiliar. Elevane frå Caen, La Union, Capadoccia og Hvar deltek i to Erasmus-pluss-prosjekt.
16 Grand Prix-songar
Ein av aktivitetane var songkonkurransen der elevane skulle framføre songar som har vore med i den internasjonale finalen i Melodi Grand Prix. Dei norske og utanlandske elevane delte seg inn i 16 grupper som valde seg kvar sin song som vart framført på scena på skulen med alle elevane og lærarar som publikum. Her fekk vi høyre Waterloo til Abba, Fairytale til Alexander Rybak, Nocturne til Secret Garden sunge på kinesisk, La det swinge til Bobbysocks og J’ame la vie som Sandra Kim gikk til topps med i Bergen i 1986.
Til topps
Elevane hadde med seg mat frå heimlandet som vart laga til og servert under songkonkurransen. Det var høg stemning og stor jubel, og til slutt kåra juryen vinnarane frå skulen Maria Cegarra i La Union i Murcia, Spania. Dei framførte det spanske bidraget til finalen i 1961: Estando contigo som den gong vart framført av Conchita Bautista og hamna på 9. plass.
Kulturell oppleving
Tobias Riple var ein av konferansierane under songkonkurransen. Han har fransk som framandspråk.
– I mars var ei veke på utveksling i Caen i Normandie. Det var ei veldig kulturell oppleving. Vi reknar med at det er mykje av den same kulturen i alle land, men det stemmer ikkje. Vi merka at i Frankrike er foreldra meir autoritære enn her og vi har mindre fridom i Frankrike enn her i Noreg. Eg har lært ein del fransk, men eg budde hos ein engelsktalande familie, så engelsken min er blitt mykje betre, seier Riple.
– Føler oss frie i Noreg
I Frankrike budde han hos familien til Naomi Abbas. No er ho i Bergen og bur hos familien til Tobias Riple.
– Det er veldig spennande å vere her. Det har vore kjekt å treffe norske ungdommar. Vi har eit godt forhold. Men det er ein god del som er forskjellig frå Frankrike og Noreg. Mellom anna et vi til heilt andre tider heime enn her, og vi føler oss meir frie her enn heime, seier Naomi Abbas.
Flott tur til Spania
Ein annan elev, Sindre Nilsen, spilte gitar på Waterloo og var i mars med spanskklassen i Cadiz, sør for Sevilla.
– Det var ein flott tur. Eg har spansk som framand språk. Foreldra i vertsfamilien eg budde hos, kunne ikkje engelsk, så eg lærte mykje spansk. Men vi elevar imellom snakkar mykje engelsk saman, seier Sindre Nilsen.
Glad for at samfunnet har opna
Maria Olsen er assisterande rektor og internasjonal koordinator ved Amalie Skram videregående skole.
– Dette er ein av de mest hektiske tidene på året når elevane reiser ut og vi får gjenvisitt tilbake. No har vi besøk hos oss frå 21. april til 10. mai. Vi er glade for at samfunnet har opna att. Sist vi hadde utanlandsk besøk var i januar 2020. Då elevane våre skulle reise på gjenvisitt to månader seinare, stengde samfunnet ned. No har vi endeleg opna igjen og kan feire med internasjonal songkonkurranse og fest her, seier Maria Olsen.
Alle vil til utlandet
Ein del av elevane på Amalie Skram videregående skole var på utanlandsbesøk i mars, mens resten av elevane skal i september.
– Alle elevane våre på vg2 får tilbod om å reise på utanlandsbesøk, og alle vil reise. Elevane lærer veldig mykje av å møte elevar i andre land og kulturen til kvarandre. Dei lærer språk, om mat og kulturen. Og dei lærer at det er ulik kultur i dei forskjellige landa. Elevane bur hos kvarandre, og vertsfamiliane viser kva kultur dei har, seier Maria Olsen.
Solidaritet
Kvart besøk har eit overordna tema. Elevane denne veka har tema om vann og korleis vi skal bruke og ta vare på det. Andre elevar har tema om solidaritet og medborgarskap. Desse elevane skal på Rafto-huset og vere med i eit solidarisk rollespel. Elles har elevane vore på utflukt til Voss og Rosendal. Fem lærarar som er med på utvekslinga, får delta på jobbskygging.
Samarbeid med mange land
Amalie Skram videregående skole har samarbeid med ein rekke land og skular i verda. Dette omfattar land som Tyskland, Austerrike, Frankrike, Spania, Kroatia, Tyrkia, Kina, Japan og Martinique.
– Alle desse samarbeida er innan studiespesialisering, men no skal vi starte eit nytt samarbeid med Cordoba i Spania på yrkesfag innan sal, service og reiseliv, fortel Maria Olsen.
Finansiering
Elevutveksling blir finansiert gjennom Erasmus pluss-midlar gjennom Direktoratet for høgare utdanning og kompetanse (HK-dir).
