Stort engasjement rundt fylket sin første transportplan
Engasjementet og kjenslene rundt samferdsle i Vestland kom sterkt fram då fylkeskommunen inviterte til tre høyringsmøte for Regional transportplan 2022-33.
Vestland si første regionale transportplan er no ute på høyring, og blir vedtatt i desember.
Regional transportplan 2022-33 for Vestland (RTP) blir det øvste plandokumentet for samferdslesektoren i fylket og skal vedtakast i fylkestinget i desember 2021.
Planen vil legge føringar for prioriteringane innan sektoren framover, og er no på offentleg høyring med høyringsfrist 12. september.
Saman i kampen for fylkesveg
Fylkeskommunen har hatt tre møte i samband med høyring av planutkastet, på Skei, i Bergen og på Stord. Engasjementet frå lokalsamfunna viste klart kor viktig samferdsle er i fjordfylket.
– Vi har fire gangar så mykje fylkesveg som riksveg i landet, og Vestland har halvparten av tunnelane og dei rasfarlege vegane. Vi har ikkje nok midlar til å ruste opp alt og gjere det trygt, vi må prioritere, seier fylkesordførar Jon Askeland.
– Eg vil oppmode alle til å stå saman i kampen for fylkesvegane, om å få midlar nok til å utvikle fylket vårt vidare, for busetnad, næringsliv og trygg framkomst, seier han.
Samferdsle vekker kjensler
Rassikring og utkastet til prioriteringsliste for rassikringstiltak i fylket var eit stort tema på høyringsmøtet på Skei, der både tårer og sinne kom fram.
– Vegen til Arnafjorden har samanhengande rasfare i seks kilometer. I vår stoppa skulebussen med ungane våre framfor eit ras i vegen medan røyken enno stod av steinane. Vi ber om at rassikringsmidlane blir brukt der rasfaren er stor, seier Bjarne Engum i Arnafjord bygdelag.
Store endringar i reisemønsteret hos kollektivreisande gjer også at fylket må utvikle sektoren og tenke nytt når det gjeld teknologi og takst.
Reell problemstilling
Eit mål i RTP er å ha god standard på all fylkesveg, men fylkesordføraren bad òg om at ein må tenke «godt nok».
– Vi må tenke kvardagsløysingar og meir veg for pengane medan vi ventar på det som er betre, seier Askeland.
Rassikring sto også på agendaen i Bergen.
Samarbeidsrådet for Voss, Vik og Aurland stiller spørsmål om det er nokre stadar ein ikkje skal bu lenger, fordi problemstillinga med ras er høgst reell for mange i distriktet.
Karstein Totland, ordførar i Masfjorden i Nordhordland, oppmoda fylkeskommunen om å nytte seg av dispensasjonssøknadar:
- Innimellom kan ein vegskulder vere godt nok. Det er ikkje alle som treng fleire meter med gang- og sykkelveg.
Forventar ikkje gullstandard
Torgeir Næss i Hardangerrådet, er einig i fylkesordføraren og Totland sin tankegang om «godt nok». I tillegg peiker han på klimautfordringar, eit underfinansiert vegnett og at floka over Tokagjelet må løysast.
Anne Grethe Sandtorv frå Stord næringsråd hadde fokus på FN sitt berekraftsmål nummer 9 som handlar om innovasjon og infrastruktur.
- Desse tinga må vere på plass skal vi vere det største verdiskapingsfylket, seier ho.
Ordførar i Ullensvang kommune, Roald Aga, opna med ei kjærleikserklæring til fylkeskommunen.
- Vi er veldig glad i fylkeskommunen, eg håpar fylkeskommunen er glad i oss. Og det har eg grunn til å tru. Ullensvang er stor på industri, men har Noregs verste vegar. Kommunen er den mest rasutsette kommunen i Noreg. Den rekorden ønskjer vi å endra på, seier Aga.
- Vi forventar ikkje gullstandard, sjølv om vi bur langs gullfjorden. Jon, og alle andre, prioriter oss, ba han vidare.
Vedtak i desember
Både samferdslepolitikarar og fylkesadministrasjonen var til stades og noterte seg innspela i dei tre møta til det vidare arbeidet med planen.
Etter høyringsfristen 12. september tek arbeidet til med å gå gjennom alle høyringsinnspela, både skriftlege og frå møta. Alle skriftlege innspel blir vurdert og presentert i ein høyringsrapport når det endelege utkastet til RTP blir lagt fram i november. Eit samandrag av høyringa der hovudtrekka blir lagt fram blir presentert for fylkespolitikarane i hovudutval for samferdsle 6. oktober. Vestland sin første regionale transportplan blir vedtatt i fylkestinget 15. desember 2021.