Oppmodar høgskulen til nytenking rundt praksisplassar
Hovudutval for opplæring og kompetanse har vedteke ei fråsegn der dei ber Høgskulen på Vestlandet ta i bruk heile fylket når dei skaffar studentar praksisplassar.
Vedtaket vart gjort i møtet 6. oktober og spring ut frå medieoppslag om høgskulen sin politikk i tilnærminga til og tildeling av praksisplassar.
Ta i bruk heile fylket
Hovudutvalsleiar Karianne Torvanger utdjupar:
– Med denne fråsegna oppmodar vi høgskulen om å ta i bruk heile fylket i arbeidet med å skaffe praksisplassar. Og vi ber dei sjå vekk frå dei gamle fylkesgrensene, slik at desse ikkje blir eit hinder for kvar studentane kan ha praksis, seier ho.
Hovudutvalet syner i fråsegna til mål 1 i utviklingsplanen for Vestland: Vestland som det leiande verdiskapingsfylket og nasjonal pådrivar for eit regionalisert og desentralisert Noreg.
Felles ansvar
Torvanger meiner høgskulen og fylkeskommunen må ta eit felles ansvar – både for å nå måla i utviklingsplanen og for å nytte heile fylket i utdanninga av framtidas arbeidstakarar.
– Utviklingsplanen gjeld for heile fylket, ikkje berre fylkeskommunen. Vi har eit felles ansvar for å nå dei definerte måla i planen. Og vi har også eit felles ansvar for å syte for at elevar, lærlingar og studentar får nytte dei gode fagmiljøa vi har i heile fylket i utdanninga si, slår ho fast.
Heile fråsegna kan du lese i møteprotokollen frå hovudutvalsmøtet.