Ny klasse for studiespesialiserande i Førde
– Vi opprettar ei ny klasse for studiespesialisering ved Hafstad vidaregåande skule. Dette vil sikre at totalt 150 elevar i inntaksområdet kring Førde som har søkt studieførebuande ved Hafstad vgs, no kan få plass, seier seksjonsleiar Øivind Høines.
Endringa vert gjort som del av førebuinga til 3. inntaket, som skal gå torsdag 5. august.
Vestland fylkeskommune har vore i dialog med både Sunnfjord kommune og søkjarar som har som førsteønske å gå studiespesialisering på Hafstad vgs. Med bakgrunn i dei innspela har avdelingsdirektøren, på fullmakt frå fylkespolitikarane, oppretta ei klasse til for studiespesialiserande ved skulen.
Politisk leiing med
Fylkesordførar Jon Askeland og hovudutvalsleiar Karianne Torvanger har tatt del i arbeidet med å vurdere alternative løysingar.
– Politisk leiing har bidrege til at saka har fått ei løysing som fleire kan akseptere, seier Torvanger.
30 fleire får plass
– Det er viktig at søkjarane sjølve følger med på Vigo, som er portalen som styrer inntaket til alle vidaregåande skular i landet, seier Øivind Høines.
I Vigo må søkjarane som får nytt tilbod om plass, velje om dei vil akseptere tilbodet etter torsdag 5. august. Inntaket vert gjort i tråd med lov og forskrift, og fylkeskommunen tildeler plassar etter karakterpoeng.
– Søkjarane har ingen garanti for å få innfridd det første ønsket sitt, men endringa sikrar at 30 fleire elevar får plass på studiespesialiserande, seier Høines.