Innfører kjønnsnøytrale titlar
Fylkestinget har vedtatt å innføre kjønnsnøytrale stillingsnemningar for alle tilsette i Vestland fylkeskommune.
Dette betyr at øvste leiar i fylkesadministrasjonen frå 1. juli 2021 skal ha stillingsnemninga fylkeskommunedirektør. Tittelen fylkesrådmann går dermed ut.
- Vestland fylkeskommune arbeider aktivt for å fremje likestilling og likeverd, både i samfunnet generelt og i eiga verksemd. Vi meiner det er eit viktig signal at dette også går fram av nemninga for den øvste ansvarlege leiaren i fylkesadministrasjonen, seier fylkesordførar Jon Askeland.
Sentrale føringar
I forarbeidet til den nye kommunelova og under framlegget i Stortinget er det lagt stor vekt på eit ønskje om å gå bort frå nemningar som ikkje er kjønnsnøytrale. Regjeringa legg også stor vekt på at stillingsnemningar i offentleg sektor må vere heilt opne både for menn og kvinner. Dei har difor innført kjønnsnøytrale titlar i staten sine verksemder. For eksempel er nemninga fylkesmann endra til statsforvaltar.
Blir avdelingsdirektør
I samband med endringane i Vestland fylkeskommune blir også nemninga for leiarnivået under fylkeskommunedirektøren justert, for å unngå mistydingar. Den noverande nemninga «fylkesdirektør» blir difor endra til «avdelingsdirektør».