Frå fylkeskommunedirektør til fylkesdirektør
Eit samrøystes fylkesting bestemde i dag at tittelen på den øvste administrative leiar i Vestland fylkeskommune skal vere fylkesdirektør.
Det var Anne Gine Hestetun som på første dag av fylkestingsmøtet i Sogndal tok initiativ til å endre tittelen. Ho fekk med seg dei 64 andre fylkestingsmedlemmane, og på dag to var ny tittel eit faktum.
Praktisk tilnærming
Fylkestinget vedtok i juni år å innføre kjønnsnøytrale stillingsnemningar for alle tilsette i Vestland fylkeskommune. Fylkesrådmann Rune Haugsdal vart då fylkeskommunedirektør Rune Haugsdal.
Sidan då har både fylkestinget og andre politiske organ gjort seg nokre erfaringar med den åtte stavingar lange tittelen.
– Det handlar om at dei folkevalde tykte 21 bokstavar og åtte stavingar vart for komplisert å uttale. Vi har ei praktisk tilnærming til det. Vi gjorde det kommunelova opna for i juni og gjekk for fylkeskommunedirektør. Det vart krevjande, og difor justerer vi no, seier fylkesordførar Jon Askeland.
Nøgd med forenkling
Den nyslåtte fylkesdirektøren er nøgd.
– Det er ein enklare tittel som alle kan uttale, og det er ein tittel folk kjenner og hugsar. Det er så enkelt som det, seier Rune Haugsdal.