Elevar ved Amalie Skram vgs. til topps i forskarkonkurranse

– Vi er utruleg stolte over å vinne, etter å ha brukt store delar av våren på å jobbe med forskingsrapporten vår i historie- og filosofifaget. Vi har tilnærma oss oppgåva med tema som maktfordeling, politikk og filosofi i tankane. Det har vore utruleg lærerikt, særleg det å øve på akademisk skriving og samfunnsfagleg forsking. Temaet er dagsaktuelt, og vi har lært mykje om Noreg og samfunnet vårt, fortel Ingrid Wittendorff Humblen, Amalie Min Bergås, Rasmus Madsen Berg og Herman Fjell Lerstad.

Imponerte juryen

Det såkalla «klimasøksmålet» oppstod då Greenpeace og Natur og ungdom saksøkte staten etter at Stortinget opna for oljeboring i Barentshavet i 2016. Organisasjonane påstod at vedtaket var i strid med Grunnlova § 112, som slår fast at alle har rett til eit miljø som sikrar helsa.

«Elevene bringer inn perspektiver fra juss, filosofi og politisk teori i argumentasjonen på en måte som imponerer», seier fagjuryen. «Elevene viser en svært god forståelse av kompleksiteten i emnet de behandler, og de lykkes med å relatere grunnleggende spørsmål innenfor politisk filosofi til et svært aktuelt tema.»

Viktig studieførebuing

Det var kunnskaps- og integreringsminister Guri Melby som i dag kunngjorde vinnarane av Holbergprisen i skulen i ei direktesending for alle som deltok. På Amalie Skram sat ein gjeng som ikkje ante noko om kva som skulle kome.

– Vi visste ingenting og vart svært overraska og kjempestolte, seier assisterande rektor Maria Olsen.

Ho fortel at det er første gong skulen deltek i konkurransen, og at det har vore særleg viktig for elevane å lære seg forskingsmetodar.

– Dei har gått inn i det med kritisk tenking og gått i djupna. Elevane har hatt ein forskarkontakt på universitetet, og denne koplinga har vore viktig. Det gjer at desse elevane er ekstra godt rusta til å starte på høgare utdanning til hausten, seier ho.

Politikk og filosofi

Lærar Sissel Solberg-Johansen fortel at prosjektet vart gjort i faget historie og filosofi, og at elevane valde tema sjølve. Dei jobba nokså sjølvstendig fram det som skulle bli ei djuptgåande, akademisk oppgåve med tematikken maktbruk og maktfordeling i samfunnet.

– Dei har brukt klimasøksmålet som døme på korleis politikarar kan både bruke og misbruke makt i samband med paragraf 112 i Grunnlova. Det er eit spennande og interessant skjeringspunkt mellom politikk og filosofi, seier ho.

Fjør i hatten for Vestland

Bjørn Lyngedal, fylkesdirektør for opplæring og kompetanse, stiller seg i gratulasjonskøen.

– Her har elevane lagt ned ein solid innsats. Dei har stilt gode spørsmål, og eg håpar prosjektet har vekka både nysgjerrigheit og engasjement, som dei kan ta med seg vidare. Eg vil gratulere både elevane, lærar, heile klassen og skulen. Det er ei fjør i hatten for heile Vestland å ha elevar som går til topps i ein slik nasjonal konkurranse, seier Lyngedal.

Han legg til at det er ekstra kjekt med ei slik utmerking etter eit skuleår med periodar med heimeundervisning.

Oppmodar andre til å delta

Heile klassen til prisvinnarane deltok i konkurransen på eige initiativ. No oppmodar dei andre elevar rundt om i fylket til å vere med på liknande konkurransar.

– Det er mykje å lære og å ta med seg vidare til studiar. Alle i klassen vår har lagt ned ein stor innsats og har skrive svært interessante oppgåver. Vi er i alle fall kjempestolte, og no ser vi fram til å feire, jublar dei fire prisvinnarane.

Både dei og dei andre finalistane blir feira og får premiane sine under Holberguken i Bergen i juni.

Les meir på holbergprisen.no.