Bømlo kommune får den nasjonale trafikksikringsprisen
Samferdsleminister Knut Arild Hareide var fredag 6. august på Bømlo for å overrekke kommunen den nasjonale prisen for framifrå trafikksikringsarbeid.
– Bømlo er utnemnt til Årets trafikksikkerhetskommune 2021. Kommunen har i ei årrekke jobba breitt og systematisk i arbeidet sitt for å betre trafikksikkerheita. Kommunen er eit godt forbilde, og viser at målretta innsats over tid gir gode resultat. Eg er stolt av den jobben heimkommunen min gjer på dette området, seier samferdsleminister Knut Arild Hareide i ei pressemelding frå Samferdsledepartementet.
Nominerte for tredje gong
Vestland fylkeskommune nominerte Bømlo kommune til den nasjonale prisen, og fylkesordførar Jon Askeland var til stades under tildelinga.
– Dette er stas, og eg vil på vegner av fylkeskommunen gratulere Bømlo med denne velfortente prisen. Dette var tredje gongen fylkeskommunen nominerte kommunen, og i år var også Statens vegvesen tydeleg i rådet i ministeren om at Bømlo er ein svært verdig prisvinnar. Kommunen har jobba godt med og prioritert trafikksikringsarbeidet over lang tid. Vi opplever at dei har dedikerte folk til arbeidet og ein god kultur, der dei jobbar aktivt til beste for innbyggjarane. Samarbeidet deira med fylkeskommunen har også vore godt på alle plan, seier han.
Bømlo kommune har fått tilskot frå tilskotsordningane til fylkeskommunen, både til fysiske tiltak og trafikktryggingsaktivitetar, som sykkelopplæring i skulen.
Flinke innbyggjarar
Samferdsledepartementet trekkjer fram ulike moment i grunngjevinga for prisen, blant anna at Bømlo vart godkjent som Trafikksikker kommune i 2017 og godkjent på nytt i 2020. Kommunen har også ein revidert trafikksikringsplan som gjeld for perioden 2020–2024. Departementet slår i tillegg fast at Bømlo kommune har innlemma berekraftsmåla til FN på ein forbiletleg måte i trafikksikringsplanen.
Fylkesordføraren skryt av både kommunen og ikkje minst innbyggjarane på Bømlo.
– Kommunen har engasjerte folk både i administrasjonen og politisk, og har kopla saman det viktige trafikksikringsarbeidet med det viktige folkehelsearbeidet. Dei legg vekt på gode rutinar for årleg oppfølging av trafikksikringsarbeidet på leiarnivå. I tillegg er lokalmiljøa på Bømlo aktive og flinke til å fremje ønske og behov når det gjeld trafikksikring, seier Askeland.
Grunngjevinga frå Samferdsledepartementet
Bømlo kommune har over lang tid arbeidet målrettet med trafikksikkerhetsarbeidet, med dedikerte personer som jobber med dette. Kommunen ble godkjent som Trafikksikker kommune i 2017 og godkjent på nytt i 2020. Bømlo kommune har en revidert trafikksikkerhetsplan som gjelder for perioden 2020 - 2024. Planen er godt utformet slik at den når mange grupper, og den er godt forankret både politisk og administrativt og i lokalmiljøet. Kommunen jobber tverrsektorielt, med en sterk kobling opp mot folkehelsearbeidet. De har også innlemmet FNs bærekraftmål i trafikksikkerhetsplanen på en forbilledlig måte. Kommunens nettsider gir en god oversikt over trafikksikkerhetsarbeidet, og er i tillegg lett tilgjengelig. Dette viser at trafikksikkerhet er et område kommunen prioriterer høyt.