Skal løfte nynorsken i Vestland
Nynorskfylket Vestland skal jobbe for å auke bruken av og fremje nynorsk på alle samfunnsområde i Vestland fylke.
Det bestemde fylkesutvalet då dei vedtok mandat for nettverket Nynorskfylket Vestland 26. november. Nettverket skal vere ein arena for deling, fagleg utvikling og språkpolitiske diskusjonar.
Samarbeid sentralt
– 20 aktørar har slutta seg til Nynorskfylket Vestland, og fylket vårt er kjerneområdet for nynorsk. Som fylkeskommune skal vi fremje nynorsken, men vi kan ikkje gjere det åleine. Å ha både det offentlege, lag og organisasjonar og privat næringsliv med på laget, er heilt avgjerande. At vi har eit klart og godt mandat å jobba etter, blir ekstra viktig med så mange aktørar og ulike interesser med på laget, seier fylkesordførar Jon Askeland.
Mandatet seier at Nynorskfylket Vestland vil løfte nynorsk som daglegspråk, i digitalisering, kunst, opplæring og arbeids- og næringsliv. Nettverket har hatt to møte i år, blant anna oppstartsmøtet i juni. Vestland fylkeskommune vel leiar for og har sekretariatsansvar for nettverket.
Mandat for Nynorskfylket Vestland
Fylkesutvalet vedtok dette mandatet:
Nynorskfylket Vestland er eit nettverk som jobbar for auka bruk og fremjing av nynorsk på alle samfunnsområde i Vestland fylke. Nettverket er arena for deling, fagleg utvikling og språkpolitiske diskusjonar. Vi vil fremje nynorsk språkidentitet og klarspråk. Vi vil løfte nynorsk som daglegspråk, i digitaliseringa, i kunsten, i opplæring, arbeids- og næringsliv. Nettverket kan gje råd til folkevalde organ i nynorsksaker.
Deltakarane i Nynorskfylket Vestland representerer frivillige, ideelle, offentlege og private aktørar med regional funksjon i Vestland.