Open prekvalifisering: Utlysing av kunstprosjekt til fylkeshuset og arkivbygget på Leikanger

Fylkeshuset

Fylkeshuset på Leikanger ligg ved riksveg 13, og var nytt då det blei teke i bruk i 1990. Fylkeshuset består av blokk A og blokk B, som er bundne saman med ein open vestibyle med glastak og ein tingsal med galleri.

Totalrenoveringa av fylkeshuset starta i 2023. Det trengde då naudsynt rehabilitering, oppgradering, effektivisering og ny solskjerming. I det rehabiliterte bygget blei dei fylkeskommunale tilsette med arbeidsstad i Leikanger, samla under same tak då bygget blei teke i bruk igjen i oktober 2024.

Fylkeshuset har blitt meir arealeffektivt, og det er godt lagt til rette for samhandling gjennom opne arbeidssoner, møterom, prosjektsoner, sosiale soner og fasilitetar som kantine, trimrom og garderobar. Det er ca. 250 arbeidsplassar med tilgjengelege solokontor, men med svært få faste kontorplassar.

Arkivbygget

Arkivbygget på Leikanger, som har fått namnet Arkivhagen, er no under sluttføring. Arkivhagen ligg ved Njøsavegen på Leikanger og skal vere eit arkivbygg for heile Vestland fylke.

Sjølve eksteriøret i bygget står fram som ganske lukka. Det er berre kontordelar og mottaksområdet som har vindauge. Det vil ikkje bli fast stasjonerte tilsette i arkivbygget, men tilsette knytt til seksjon arkiv vil i periodar arbeide her.

Kunsten

Kunsten skal vere på høgt kunstnarisk nivå og av god kvalitet. Det er eit mål at kunsten kan tilføre rom og omgjevnader nye dimensjonar og tydingar. Kunsten kan gje brukarar og besøkande nye perspektiv, tankar og kjensler.  

Kunstprosjekta vil bli godt synlege i dei mest sentrale og mest besøkte delane av bygget, og i nærleiken av inngangsparti. Utvalet har definert to delprosjekt til denne prekvalifiseringa: eit til fylkeshuset og eit til arkivbygget.

Vi definerer ingen særskild tematikk for kunsten, men håper på prosjekt som kan vekke nysgjerrigheit hjå målgruppa, og bidra til refleksjon, engasjement og open samtale.  

Kunstutvalet vil invitere dei valde kunstnarane til ein vidare prosess basert på innsendte søknader.

Søknaden

Profesjonelle kunstnarar og kunsthandverkarar kan søke. Me oppfordrar også kunstnarar utan tidlegare erfaring frå kunst i offentleg rom til å søke. 

Søknaden skal innehalde

• Kort tekst om din grunngjevne interesse/motivasjon for oppdraget. Om du ønsker det kan du her spesifisere kva for eit oppdrag du er mest interessert i, fylkeshuset eller arkivbygget. Grunngjeven interesse/motivasjon for oppdraget skal leggast inn i tekstboks i søknadsskjemaet, som har ei avgrensing på 750 teikn. Dersom teksten din er lengre enn dette, kan du legge dette inn i vedlegg. 
  Me ønskjer ikkje konkrete forslag i denne delen av prosessen, og set pris på at du uttrykker deg kortfatta og presist. 
• Dokumentasjon av relevante tidlegare arbeid, og oppdatert CV (evt. inkl. kort bio). 

Kunstnarar blir bedne om sende inn inntil ti foto av relevante arbeid dei har gjennomført, CV, kort presentasjon av eigen kunstnarskap og motivasjon for å lage permanent kunst til fylkeshuset eller Arkivhagen på Leikanger. Namngje dokumentet: etternamn_fornamn.pdf

Søknadsfrist

1. august 2025