Krav om nullutslepp for alle drosjar i fylket
Frå 1. april 2024 blei det innført miljøkrav til drosjenæringa i tidlegare Hordaland fylke. Frå 1. april 2026 blir dei samme krava innførte i resten av fylket.
Omstilling til grøn drosjenæring i Vestland fylke VIDEO: KLP
Vestland fylkeskommune har vedteke å innføre nullutsleppskrav for drosjenæringa i kommunar frå tidlegare Hordaland frå 1. april 2024. Tilsvarande krav for dei resterande kommunane i Vestland fylke gjeld frå 1. april 2026.
Biler med nullutslepp er per i dag hydrogenbil og elbil.
Dette betyr at drosjer som køyrer internt i Alver, Askøy, Austevoll, Austrheim, Bergen, Bjørnefjorden, Bømlo, Eidfjord, Etne, Fedje, Fitjar, Kvam, Kvinnherad, Masfjorden, Modalen, Osterøy, Samnanger, Stord, Sveio, Tysnes, Ullensvang, Ulvik, Vaksdal, Voss herad og Øygarden må frå 1. april 2024 køyre bil med nullutslepp.
Drosjer som køyrer internt i Askvoll, Aurland, Bremanger, Fjaler, Gloppen, Gulen, Hyllestad, Høyanger, Kinn, Luster, Lærdal, Sogndal, Solund, Stad, Stryn, Sunnfjord, Vik og Årdal må frå 1. april 2026 køyre bil med nullutslepp.
Den lokale forskrifta er fatta med heimel i yrkestransportlova § 9 andre ledd.
Forskrift om miljøkrav til drosjenæringa i Vestland fylke
Dette er vedtaket som fylkestinget har fatta
Fylkestinget vedtok 16. mars 2022 å endre forskrift om miljøkrav til drosjenæringa i kommunar i Vestland fylke:
§1. Løyvehavar pliktar å sørgje for at drosje registrert for inntil 9 personar ikkje har utslepp frå forbrenningsmotor ved køyring i følgjande kommunar: Alver, Askøy, Austevoll, Austrheim, Bergen, Bjørnefjorden, Bømlo, Eidfjord, Etne, Fedje, Fitjar, Kvam, Kvinnherad, Masfjorden, Modalen, Osterøy, Samnanger, Stord, Sveio, Tysnes, Ullensvang, Ulvik, Vaksdal, Voss herad og Øygarden.
§2. Løyvehavar pliktar å sørgje for at drosje registrert for inntil 9 personar ikkje har utslepp frå forbrenningsmotor ved køyring i følgjande kommunar: Askvoll, Aurland, Bremanger, Fjaler, Gloppen, Gulen, Hyllestad, Høyanger, Kinn, Luster, Lærdal, Sogndal, Solund, Stad, Stryn, Sunnfjord, Vik og Årdal.
§3. Løyvehavar pliktar straks å gje skriftleg melding til løyvestyresmakta dersom drosjen har brote miljøkravet i §§ 1 og 2.
§ 4. Løyvehavar kan utføre oppdrag frå ein stad utanfor kommunen med miljøkrav til ein stad innanfor kommunen med motorvogn som ikkje oppfyller krava i § 1. I samband med ein slik tur er det tillate å ta med passasjer på oppdrag ut av kommunen. Tomkøyring inn til ein kommune med miljøkrav for å utføre oppdrag ut av kommunen er berre tillate for bestilte turar.
Forskrifta trer i kraft 1. april 2024, med unnatak av § 2, som trer i kraft 1. april 2026.
Andre vedtakspunkt som vart vedteke av fylkestinget:
- Fylkestinget ber om at utval for samferdsel og mobilitet i 2022, før praktisk iverksetjing av forskrifta i 2024, får ei orientering om stoda kring ladeinfrastruktur, køyrety for personar med nedsett funksjonsevne, køyrety med 4-hjulstrekk, konsekvensar for grensekommunar og korleis endringar i yrkestransportlova slår inn for drosjenæringa.
- Når det gjeld fylkeskommunal støtte og investering til ladeinfrastruktur skal alle kommunar i Vestland fylkeskommune prioriterast på lik linje, etter ein felles gjennomgang og som legg til rette for at forskrifta kan innførast for heile fylket.
- Fylkestinget ber om at arbeidet med å byggje ut ladeinfrastruktur i heile Vestland fylke held fram.
- Fylkestinget ber regjeringa innføre dispensasjonsadgang i nasjonale føresegner som sikrar at brukargrupper som ma treng rullestolbil, ikkje vert ståande uten tilbod.
- Fylkestinget ønskjer at det vert etablert lynladerar ved alle sjukehusa, og at det vert vurdert løysingar som prioriterer drosjene.