Forslag til ny tenestestruktur for tannhelsetenesta er lagt ut på høyring
Korleis skal vi koordinere og samordne tannhelsetenesta slik at vi sikrar tilgjengelege og rettferdige tenester for innbyggjarar i heile fylket?
Dette er noko av det Vestland fylkeskommune ønskjer innspel på når forslag til ny tenestestruktur for den offentlege tannhelsetenesta no er lagt ut til offentleg høyring. Fristen for å kome med høyringsinnspel er 2. desember 2025.
Framtidsretta og berekraftig
Den nye tenestestrukturen legg opp til ei justering av dagens klinikkstruktur i to trinn fram mot 2036. Dei største endringane kjem i trinn 2, men heile planen med alle justeringar er lagt ut på høyring.
– Målet med saka er å sikre ei framtidsretta, berekraftig og fleksibel offentleg tannhelseteneste for innbyggjarane i heile Vestland. Vi må kunne rekruttere godt kvalifisert tannhelsepersonell, og gje eit best mogleg tilbod til pasientane i moderne klinikkar. Difor legg vi forslaget frå fylkesdirektør ut på høyring. Målet er å få mange innspel, før endeleg politisk handsaming av saka, seier fylkesvaraordførar Stian Davies, som leia møtet i fylkesutvalet 21. oktober.
Fylkesutvalet har no lagt fylkesdirektør sitt forslag ut på høyring, før politisk handsaming.
Frå mange små til færre større klinikkar
Fylkestinget vedtok i oktober 2024 temaplan for tannhelsetenesta, og det er denne som er fundamentet i og set strategisk retning for tenesta i åra framover. Utifrå temaplanen er det laga ein tiltaksplan, der eitt av tiltaka er å lage ein ny tenestestruktur, inkludert klinikkstrukturplan.
Hovudelementa i ny tenestestruktur er å
- gå over frå mange små til færre og større klinikkar
- sikre god leiing, samordning og koordinering av tenestene
- følgje opp krav til klinikkstandard – «Vestlandsklinikken»
- utvide opningstider ved enkelte tannklinikkar
- sikre tilgjengelege og rettferdig fordelte tenester i heile fylket
Fleire utfordringar framover
Tannhelsetenesta står overfor fleire utfordringar i åra som kjem. Desse er identifiserte i temaplanen. Utfordringane går blant anna på at det blir fleire ressurskrevjande og prioriterte pasientar og for lite og skeivt fordelt tannhelsepersonell. I tillegg er det stor variasjon når det gjeld størrelse, standard og drift på klinikkane, og også auka krav til forsking og kunnskapsbasert praksis.
– Det er viktig at vi sikrar eit godt og rettferdig tilbod for alle innbyggjarane i Vestland. Derfor går vi breitt ut for å få gode innspel. No håpar vi kommunane, brukar- og interesseorganisasjonar, foreiningar og andre engasjerer seg, slik at vi saman får på plass ein god ny tenestestruktur, seier fylkesvaraordføraren.