Breiband: Vil satse meir langsiktig og målretta
– Alle må ha like god tilgang til breiband, både i byane og på bygda. Det er ei viktig politisk satsing og nødvendig for at folk skal ha like moglegheiter og lik tilgang til tenester, seier Sigrid Brattabø Handegard, leiar for hovudutval for næring.
Hovudutvalet ber no fylkesdirektøren om å arbeide vidare med rammene for ei handlingsretta programsatsing basert på Temaplan for breiband og digitalisering som blei vedtatt i 2023.
– Vestland er det fylket med best dekning. Tida er inne for å setje retning framover med eit auka fokus på kompetanse, effektivisering og innovasjon, og korleis vi skal utvikle infrastrukturen best mogleg, seier Brattabø Handegard.
Rask digital utvikling
Formålet med temaplanen for breiband er å samordne arbeidet med digital infrastruktur og digitalisering, legge føringar for verkemiddel som blir forvalta og peike på moglegheiter og utfordringar innan digitalisering. Mål og prioriteringar skal vurderast annakvart år, og eventuelt justerast dersom det er behov for det. No, to år etter at planen blei vedtatt, har situasjonen på det digitale feltet endra seg.
Nasjonale og internasjonale satsingar
Det har komme fleire nye nasjonale og internasjonale satsingar, der mange går over fleire år. Satsingane handlar mellom anna om digital infrastruktur, samfunnsutvikling, kompetanse, verdiskaping og innovasjon. Dette gjer også at det er aktuelt for Vestland fylkeskommune å vere meir langsiktige, handlingsretta og operative på det digitale feltet.
Risikoanalyse for Vestland
Regjeringa har varsla ein ny nasjonal sikkerheitsplan for digital infrastruktur med tiltak for å sikre elektronisk kommunikasjon i heile Norge. Nasjonal kommunikasjonsmyndigheit (Nkom) skal gjennomføre risiko- og sårbarheitsanalyse for Vestland, noko dei allereie har gjort i fleire andre fylke (på oppdrag frå Digitaliserings- og forvaltningsdepartementet).
– I tida vi er i må vi ha større fokus på beredskap for å sikre at folk, næringsliv og samfunn har lik tilgang til trygg mobildekning og internett-tilgang, seier Brattabø Handegard.
Vil du vite meir?
I saksframlegget kan du lese meir om status knytt til dei fire hovudsatsingane i temaplanen: digital infrastruktur, samfunnsutvikling, kompetanse, verdiskaping og innovasjon. Du finn og informasjon om kva for område som er viktige i ei langsiktig programsatsing.