Inviterer til idretts- og familiedag i spektakulær tunnel
– Dette er ein fantastisk og spektakulær gang- og sykkeltunnel, seier fylkesordførar Jon Askeland. Til våren opnar den tre kilometer lange Fyllingsdalstunnelen. Men før opning blir det idretts- og familiedag og løp gjennom tunnelen.
Den tre kilometer lange tunnelen binder Fyllingsdalen og Bergensdalen saman. Den er rømmingsveg for Bybanetunnelen, men blir også gang- og sykkelveg. Dette er den lengste i Europa og den lengste heilårs gang- og sykkeltunnelen i verda.
Laurdag 15. april
Idretts- og familiedagen blir laurdag 15. april.
– Eg gler meg til å kunne ønskje Bergen velkommen til å oppdage tunnelen under dette arrangementet, seier fylkesordførar Jon Askeland. Han har alt funne fram løpsskoa.
Arrangementet blir eit samarbeid mellom BFG Bergen Løpeklubb og Fyllingen IL.
– Idretts- og familiedagen 15. april skal vere eit ope arrangement som skal famne om alle framtidige brukarar av denne tunnelen. Vi er så stolte over å få lov til å arrangere denne dagen, seier styreleiar Bjørn Laastad i BFG Bergen Løpeklubb.
Løp på 3 og 5 kilometer
Det blir fleire aktivitetar på idretts- og familiedagen.
– Vi skal ha løp på høvesvis 3 og 5 kilometer. Vi skal ha sykkelløp for barn med eigen klasse for trehjulsyklar, og heile familien kan ta ein gåtur for roleg å oppdage tunnelen både gjennom sansane og gjennom oppgåver dei kan løyse på vegen gjennom, seier Laastad.
Arrangementet startar i Fyllingsdalen frå klokka 10 laurdag 15. april.
Bybanen utbygging bygger tunnelen for Vestland fylkeskommune.
– Det er god tradisjon at byggherre set vegar og tunnelar til disposisjon for idretten før anlegget blir opna for ordinær trafikk. Det er vi glade for at vi no får til i den nye gang- og sykkeltunnelen også, seier konstituert prosjektdirektør Terje Simmenes i Bybanen utbygging.
Binde saman bydelar
Tunnelen vil binde folk på begge sider av Løvstakken saman.
– Fyllingsdalstunnelen vil knytte Fyllingsdalen og Bergensdalen tettare saman både for gåande, syklande og løpande. No kan vi oppleve denne nye, flotte tunnelen på dette idrettsarrangementet. Både små og store blir inviterte til å delta og oppleve det som kan bli den første av fleire turar i tunnelen, seier byråd for klima, miljø og byutvikling, Ingrid Fjeldstad Nergaard i Bergen kommune.
Kort om gang- og sykkeltunnelen
Lengde: 3 kilometer
Separat sykkel – og gangfelt
Kameraovervaking
Lys i taket som endrar seg frå grønt i Fyllingsdalen til blått ved Kristianborg
Sykkeltid: ca 10 min
Gåtid: ca 45 min
Opning: vår 2023
