Ung kultur møttest igjen
Etter to år med digital fylkesfestival, kunne over 250 ungdommar frå 13 til 20 år endeleg møtast og delta på den første ikkje-digitale UKM Vestland fylkesfestival.
UKM står for ung kultur møtest, og årets festival gjekk føre seg to stadar samtidig. Ungdommar frå Hordaland møttest i Voss kulturhus, medan ungdommar frå Sogn og Fjordane møttest i Nordfjordhallen i Måløy. Men med lærdom frå to år med digital fylkesfestival, var det digitale løysingar også i år.
Felles UKM Vestland-identitet
– Sjølv om det var to fysiske festivalar, så ønska vi å knyte dei saman og skape ein felles UKM Vestland-identitet. Det er viktig å ta med seg erfaringar frå dei to siste «unntaksåra» og slik forme og løfte festivalen inn i framtida, seier Simen Lagesen Krogstie, som er ansvarleg for UKM i Vestland fylkeskommune.
Vestland fylkeskommune har ansvar for arbeidet med UKM på regionalt nivå og for gjennomføringa av UKM-festivalen for Vestland.
Fellesskapskjensla vart skapt ved at det var videoproduksjonar både på Voss og i Måløy. Slik vart førestillingane strøyma frå den eine staden til den andre, i tillegg til at det vart sendt i UKM-TV.
Meir enn scenekunst
Scenekunst er ein stor del av UKM, og ungdom deltek med det sceneuttrykket dei ønskjer. Det er dans og musikk i ulike former, både soloopptredenar og i grupper. Det er blåseinstrument, strengar, rockeband, instrumental og a cappella. Men UKM er ikkje noko konkurranse, og det er mykje meir enn dans og musikk. Unge arrangørar er også ein viktig del av UKM. Det er ungdommane sjølve som er blant anna sceneansvarlege, dei er konferansierar, sekretariat og jobbar opp mot media.
I år arrangerte dei to lokale produsentane for festivalane – Hending i Måløy og Bergen Live på Voss – ei rekke spennande workshops. Ungdommane hadde tilbod om workshops i blant anna sosiale medium, omsying og gatekunst.
Gratis inngang for dei under 20
Endå ein dimensjon av UKM er kunstutstillinga. Her får ungdommane høve til å syne fram kunstverk av ulike slag, teikningar, måleri, akvarellar og teikneseriar av ulike teknikkar, materialar, formar og fargar. Det var også stilt ut skulpturar og anna handarbeid.
Heile helga kunne både ungdommane som deltok, og alle andre som ønskte, få med seg både kunstutstillinga og dei ulike sceneinnslaga. Det var gratis inngang for alle under 20 år både på Voss og i Måløy.
– Tanken var at ved å gje gratis inngang til denne gruppa, kunne vi bryte barrierar og jobbe for inkludering. Vi ønskjer at UKM skal vere ein open og inkluderande arena med eit stort mangfald av ungdommar. UKM handlar mest av alt om å vere saman og dele uttrykka sine med andre, seier Krogstie.
Mangfald, kreativitet og entusiasme
Sjølv om det viktigaste med UKM er mangfald, kreativitet, entusiasme og å møtast for å dele kulturelle uttrykk, vert også nokre av deltakarane sende vidare til den nasjonale UKM-festivalen. Årets festival vert i Kimen kulturhus i Stjørdal 24.–28. juni.
Fagpanela som var i sving på Voss og i Måløy la særleg vekt på breidde, nyskaping og innslag som byggjer på ein original idé då dei valde ut kven som skal representere Vestland i Stjørdal. Dei vurderte også originalitet, tolking og formidling, i tillegg til kommunikasjon, formidlingsevne og mot til å gå nye vegar.
Deltakarane som blir vidaresende til den nasjonale festivalen må vere mellom 15 og 20 år, då det krevst at dei er meir sjølvstendig og får meir ansvar enn under fylkesfestivalen.