Slik får du fagbrev som vaksen

Som vaksen kan du ta fagbrevet på fleire måtar. Ordningane er fleksible og tar utgangspunkt i kompetansen du allereie har.

Korleis ta fagbrev som vaksen?

Det fins fleire ordningar for vaksne som vil ta fagbrev:

• Praksiskandidatordninga er for deg med lang og relevant praksis i yrket
• Fagbrev på jobb er for deg som er i arbeid og vil kombinere jobb og opplæring
• Modulstrukturert opplæring passar for deg som vil ta opplæringa i eige tempo

Kva er realkompetansevurdering?

Realkompetansevurdering betyr at alt du har av kompetanse blir vurdert opp mot læreplanen. Når du tar fagbrev som vaksen er realkompetansen din avgjerande for kor lang vegen fram til fagbrevet blir. Dette er summen av all kunnskap du har fått gjennom jobb, fritid og utdanning.

– Før du begynner prosessen med å få vurdert realkompetansen din, er det viktig å samle saman det du har av dokumentasjon. Det kan for eksempel vere vitnemål eller attestar som viser yrkeserfaring eller frivillig arbeid, seier Audun Bjelland, prosjektleiar vaksenopplæring og rektor i Nettskulen Vestland.

Kva støtte kan du få?

Vaksne som vil ta fagbrev kan få støtte undervegs:

• Fylkeskommunen tilbyr rettleiing gjennom Rettliingstenesta
• Økonomisk støtte gjennom NAV eller Lånekassen er avhengig av situasjon

Det er mange vegar til fagbrev i vaksen alder. Ta kontakt med rettleiingstenesta tidleg for å kartlegge den beste vegen til fagbrev for deg.

– Det viktigaste er at du vel eit fag du er interessert i. Motivasjon er viktigare enn løn på lang sikt, seier Bjelland.

Gjennom Fagveg samarbeidar NAV, fylkeskommunen og bransjar aktivt for å hjelpe fleire vaksne over 19 år å få fagopplæring og fagbrev, og vidare ut i jobb.