Høyring: Planprogram for Regional plan for verdiskaping og kompetanse

No kan du seie di meining om planprogrammet for ein ny regional plan for verdiskaping og kompetanse i Vestland.

Vestland fylkeskommune har starta arbeidet med ny, regional plan for verdiskaping og kompetanse. Planen er tverrsektoriell og skal erstatte fleire eksisterande regionale planar og temaplanar.

Planprogrammet er ei «oppskrift» for korleis vi skal jobbe ut dei nye planane. Her foreslår vi kva føremålet den nye planen skal ha, kva tema den skal omfatte, tidsplan, prosess og korleis vi skal sikre medverking.

Kva skal planen handle om?

Planen skal:

gi rammer og føringar for utvikling av næringsliv, arbeidsplassar og kompetansefeltet.
vise korleis verdiskaping og kompetanse kan bidra til å nå måla i Utviklingsplan for Vestland 2024–2028.
sikre samordning mellom stat, fylkeskommune og kommunar.

Fylkeskommunen foreslår at planen skal omfatte to hovudtema, med deltema:

Omstilling og konkurransekraft

Moglegheiter og barrierar på tvers av verdikjeder og næringar
Sirkulærøkonomi
Innovasjonssystemet

Kompetanse og inkludering

Breitt og fleksibelt kompetansetilbod
Gjennomføring og kvalifisering i utdanningssystemet
Mangfaldig og inkluderande arbeidsliv

Slik sender du inn høyringsinnspel

Du sender innspel i eit digitale høyringsskjema. Skjemaet er delt inn etter avsnitt i forslaget til planprogram:

Rammer og føringar (kap. 2).
Plantema (kap. 3).
Behov for kunnskap og utgreiingar i planprosessen (kap. 4)
Oppfølging av planen (kap. 5).
I tillegg er det mogleg å legge inn andre kommentarar i feltet «Anna".

Det er viktig at høyringsinnspel er presise og tydelege, og plasserte under rett tema. Det lagt inn ei avgrensing på 4000 teikn per svarfelt.

Innspelsmøte

Delta på digitalt innspelsmøte for å få ytterlegare informasjon om planprogramma, stille spørsmål og gi innspel til arbeidet.
Tid: 09. september, klokka 13.00 - 15.00. Møtelenke blir publisert her.