Støttar satsing på skogbruk og auka steinfruktproduksjon i Hardanger
Vestland fylkeskommunehar fordelt 1,8 millionar kroner i regionale tilretteleggingsmidlar i landbruket. Pengane går til åtte prosjekt rundt om i fylket, mellom anna satsing på plommer og morellar i Hardanger, skogbruk og rekruttering av ungdom til landbruket.
Hovudutval for næring løyvde midlane 11. november. Fleire av prosjekta skal bidra til auka kompetanse og rekruttering til landbruksnæringa.
– Skal vi ha levande bygder i framtida, må vi også ha eit landbruk som utviklar seg. Vi treng både unge som vil inn i næringa, og bønder som har høve til å satse vidare. Det handlar om å ta vare på ressursane våre og skape arbeidsplassar og verdiar i heile fylket. Difor er det viktig å støtte prosjekt som både utviklar eksisterande næringar og får nye generasjonar med på laget, seier Sigrid Brattabø Handegard, leiar for hovudutval for næring i Vestland fylkeskommune.
Framtidas plommer og morellar i Hardanger
Hardanger Fjordfrukt SA får 1 023 000 kroner til prosjektet «Framtidas steinfrukt i Hardanger 2», som skal bidra til å snu nedgangen i produksjonen av plommer og morellar i Hardanger.
Steinfruktnæringa i Hardanger opplever utfordringar med fallande produksjon, svak lønsemd og behov for større investeringar. Prosjektet skal styrkje kunnskapen om drift og produksjonsmetodar, motivere produsentane og bidra til framtidig vekst og verdiskaping.
Gartnerhallen melder om aukande interesse for norsk frukt i handelen. For morellar er det venta ein vekst i etterspurnaden på rundt 20 prosent frå 2025 til 2026.
Målet er å auke produksjonen gjennom mellom anna nye morelltunellar, fornying av plommetre og kompetanseheving blant produsentane.
Fleire kurs i skogbruk
Sogn og Fjordane Skogselskap får inntil 234 839 kroner til korte kurs i skogbruket. Skogselskapet planlegg om lag 35 kurs og arrangement for skogeigarar og andre skoginteresserte i Vestland i 2027. Tilbodet omfattar mellom anna fagkveldar, digitale samlingar og motorsagkurs for ungdom og kvinner.
– Det er eit stort potensial for auka verdiskaping i skogbruket i fylket, og behov for både rekruttering og kompetanseheving. Kursa vi no støttar kan bidra til auka kunnskap og motivasjon for å drive framtidsretta skogbruk, seier Handegard.
Sommarjobb i skogen
Sogn og Fjordane Skogselskap får også inntil 192 000 kroner til eit rekrutteringsprosjekt som skal gi 12 lokale ungdommar mellom 15 og 25 år sommarjobb i skogen i 2027.
Ungdommane skal få praktisk opplæring i skogbruk, mellom anna i bruk av motorryddesag og ungskogpleie. Dei skal også besøkje bedrifter i skog- og trenæringa og få informasjon om utdanningsmoglegheiter innan skogbruk.
Målet er at det skal gjennomførast ungskogpleie på til saman 300 dekar sommaren 2027.
Prosjektet har vore gjennomført i tre år tidlegare. Sommaren 2027 blir dermed det fjerde året med tilbodet, som er del av ei større satsing på rekruttering til skognæringa i ti fylke.
Avløysarkurs for ungdomsskuleelevar
Landbrukskontoret for Gloppen og Stad får 50 000 kroner til eit avløysarkurs for elevar i arbeidslivsfag ved Gloppen ungdomsskule.
Kurset skal etter planen starte vinteren 2027 og gi elevane både teoretisk og praktisk opplæring i arbeid på gard. Dei skal mellom anna lære om fôring og stell av dyr, helse, miljø og tryggleik. Målet er at halvparten av deltakarane skal få helge- eller sommarjobb på ein gard i løpet av 2027.
Gloppen ungdomsskule fekk også tildelt 51 000 kroner i regionale tilretteleggingsmidlar i oktobermøtet til hovudutvalet. Pengane skal gå til kurs i grunnleggjande vedlikehald og bruk av motorsag for elevar i arbeidslivsfag. Etter kurset skal elevane bruke det dei har lært til å rydde skog utover våren.
Desse får regionale tilretteleggingsmidlar
- Landbrukskontoret for Gloppen og Stad: 50 000 kroner til avløysarkurs i arbeidslivsfag ved Gloppen ungdomsskule. Tilskotet føreset fullfinansiering og oppdatert finansieringsplan.
- Hardanger Fjordfrukt SA: 1 023 000 kroner til prosjektet «Framtidas steinfrukt i Hardanger 2».
- Lærdal kommune: 150 000 kroner til forprosjektet «Liv og landskap – foredling og formidling av inn- og utmarksressursar i ÅLA».
- Sogn og Fjordane Skogselskap: Inntil 234 839 kroner til prosjektet «Korte kurs i skogbruket». Tilskotet føreset godkjend kostnads- og finansieringsplan.
- Sogn og Fjordane Skogselskap: Inntil 192 000 kroner til «Rekrutteringsprosjekt for skogbruket i Vestland».
- Sogn og Fjordane Skogselskap: Inntil 30 000 kroner til prosjektet «Samling for skogengasjerte i Indre Sogn».
- Stryn ungdomsskule: Inntil 52 260 kroner til motorsagkurs for elevar på 10. trinn.
- Førde vidaregåande skule, kurstad Mo: Inntil 98 050 kroner til fem kurs i prosjektet «Korte kurs i landbruket». Støtta omfattar ikkje sveisekurs eller kurs i grunnleggjande traktorkøyring.