Søk om 150 000 kroner i nynorskstipend

Nynorskstipendet til Vestland fylkeskommune kan gå til forfattarar, dramatikarar eller andre som formidlar nynorsk i tekst og på scene. Søknadsfristen er 1. juni.

Gatemåleri av Ivar Aasen, med raudt, kvitt og blått bak og rundt portrettet.
NYNORSK: Noko av målet med nynorskstipendet er å styrke språket som både kunst- og kvardagsspråk. Dette gatekunstmåleriet av Ivar Aasen heng på Bergen katedralskole. Det er laga av Slava Nemes Matisic, og oppdraget var å lage eit kunstverk som syner Ivar Aasen som eit førebilete på kreativitet og fagkunnskap. (Foto: Martin Magnussen/Vestland fylkeskommune)
Av Birthe Johanne Finstad Publisert Endra

Målet er å gjere nynorsk meir synleg som både språk og kulturberar. Utlysinga er nasjonal, men mottakaren må ha tilknyting til Vestland gjennom virket sitt.

– Som det største nynorskfylket og det leiande kulturfylket i landet, skal Vestland ta eit nasjonalt ansvar for nynorsk. Eit av våre mange tiltak for å styrke nynorsk som både kunstspråk og kvardagsspråk er dette stipendet, seier Jacob Nødseth, leiar for hovudutval for kultur, idrett og inkludering.

Må søkje om stipendet

Nynorskstipendet vart delt ut for første gong i 2025. Då kunne alle nominere kandidatar, og det kom inn til saman 59 nominasjonar.

Dette er no gjort om, og i år må kunstnarar og andre sjølve søkje om å få stipendet. Forlag og andre institusjonar på kulturfeltet kan søkje på vegne av ein kandidat, men kandidaten må då samtykke til søknaden.

Fristen for å søkje på stipendet er 1. juni.

Stipend for å heidre Fosse

Forfattar Gunnhild Øyehaug fekk det første nynorskstipendet til Vestland fylkeskommune. Ho er ein av dei fremste skjønnlitterære forfattarane i landet og har sidan 1998 gitt ut ei rekke novellesamlingar, romanar og essaysamlingar.

Vestland fylkeskommune oppretta stipendet i 2025. Som heimfylket til Jon Fosse ønskte Vestland å heidre forfattaren og har valt å gjere det i form av dette stipendet.