Sender regional plan for vassforvaltning ut på høyring

Fylkesutvalet vedtok 21. oktober å sende Regional plan for vassforvaltning for Vestland vassregion 2028–2033 ut på høyring. Fristen for å sende innspel er 30. april 2027.

Heile Europa

– Menneskeleg påverknad og klimaendringar påverkar vassdrag, kystvatn og grunnvatnet. Vassforvaltningsarbeidet gjennom vassdirektivet går føre seg i heile Europa. Dette arbeidet er avgjerande for at vi i framtida skal ha god miljøtilstand i vassdraga våre, kystvatn og grunnvatn, seier fylkesordførar Jon Askeland.

God miljøtilstand inneber at vassdrag, innsjøar og kystvatn er i god økologisk og kjemisk balanse, og ikkje er vesentleg negativt påverka av menneskeleg aktivitet.

– Den nye planen fastset miljømål og viser korleis vi ynskjer å forvalte vassmiljøet og vassressursane i eit langsiktig perspektiv, seier Askeland.

I tillegg til sjølve planen gjeld høyringa også tiltaksprogrammet og handlingsprogrammet til planen.

Vassregionutvalet

Planutkasta som no er ute på høyring er utarbeidd i samråd med Vestland vassregionutval, noko som inneber at kommunar, fylkeskommunar og statlege etatar både har bidrege inn i planarbeidet og har slutta seg til planutkasta. Sektorstyresmaktene som er ein del av vassregionutvalet er involverte i gjennomføringa av planen.

– Vassforvaltningsplanen skal sikre ei god og samordna vassforvalting, der ansvarleg styresmakt følgjer opp planen innanfor sine ansvarsområde. Miljømåla skal beskytte vassførekomstane og sikre ein berekraftig bruk, seier Askeland.

Fylkestinget skal vedta

Vassforvaltningsplanen som no er ute på høyring, er ei oppdatering av den gjeldande regionale planen for vassforvaltning med planperiode frå 2022 til 2027. Den regionale planen for vassforvaltning skal til politisk behandling og endeleg vedtak i fylkestinget hausten 2027. Ettersom nabofylka til Vestland også har et lite areal som er omfatta av planen, skal planen vedtakast i til saman fem fylkesting.