Ny skrivemåte for fylkesvegtunellane
Som hovudregel skal fylkeskommunen no nytte skrivemåten -tunell og ikkje -tunnel når nye tunellar skal få namn. Første nye tunell som får namnet er Krokatunellen i Kvinnherad kommune.
Det var fylkesutvalet i Vestland som gjorde vedtaket om namn på fylkesvegtunellen og skrivemåte i møtet 8. mars 2023.
På Vestlandet seier vi tunell
– Med tunell får vi ein skrivemåte som samsvarar betre med vestlandsdialektene, og det er fint, seier fylkesordførar Jon Askeland.
– Så skal kommunen sitt ynskje i den enkelte navnesaka også leggast vekt på framover.
Saka om skrivemåte kom fram da den nye tunellen ved Kroka skulle få namn. Skrivemåten i fylkeskommunen har vore tunnel med to n-ar og da namneendinga -tunnel, det same som Statens vegvesen nyttar, og tilrådd namn var Krokatunnelen. Men i høyringsrunden om namnevalet kom det inn to høyringsuttalar som begge reagerte på denne skrivemåten.
Lokal uttale skal ligge til grunn
Ingvard Tveitnes frå Kvinnherad meinte at det jamfør stadnamnlova er den lokale uttalen som skal ligge til grunn for skrivemåten. I Kvinnherad blir dette -tunell med to l-ar, og Krokatunellen.
Språkrådet sa i sin uttale at dei to skrivemåtane er jamstilte både på bokmål og nynorsk, og at «det er skrivemåten tunell som ligg nærast den dialektuttalen som ordet har på Vestlandet.», og viste også til stadnamnlova. Språkrådet tilrådde også at skrivemåten -tunell blir nytta gjennomørt i heile Vestland fylke.
Ikkje endring av eksisterande skilt
Fylkesutvalet slutta seg samrøystes til dette, og Vestland fylkeskommune skal som hovudregel nytte endinga -tunell. Alle nye tunellar får no denne endinga i namnet sitt, men om kommunen tunellen ligg i vil ha ein annan skrivemåte skal dette vektleggast.
Vedtaket får ikkje attendevirkande kraft, så tunellar som heiter -tunnel, kjem framleis til å ha denne skrivemåten på skilta sine.