Lyser ut 800 000 kr til ro- og padleruter
No kan kommunar og interkommunale friluftsorganisasjonar søkje fylkeskommunen om pengar til både kartlegging av ro- og padleruter og fysisk tilrettelegging for padling og roing.
Alle kommunane i Vestland har kystlinje, og til saman har fylket ei oppstykka kystlinje på 19 339 kilometer med fjordar og øyer. Det betyr gode naturgitte forhold for å ta seg fram sjøvegen.
No tek Vestland fylkeskommune gjennom prosjektet Ro- og padleruter i Vestland ei koordinerande rolle i arbeidet med å leggje endå betre til rette.
Kartlegging og infrastruktur
Kommunar og friluftsorganisasjonar kan altså få støtte til både kartlegging og fysisk tilrettelegging. Kartlegging kan gå ut på å til dømes skaffe seg oversikt over både sjølve ro- og padlerutene, men også tilknytt infrastruktur. Det kan vere parkeringsplassar, utsetjingsbrygger, toalett og anna.
Fysisk tilrettelegging kan vere til dømes skilting, bygging av ramper/brygger, utbetring av tilknytte fasilitetar som toalett, overnattingsmoglegheiter og anna.
Frist 15. september
I tillegg kan friluftsråda søkje om tilskot til å gjennomføre eigne tilretteleggingsprosjekt retta mot roing og padling i Vestland. Tilrettelegginga må då vere i tilknyting til eksisterande eller framtidige ro- og padleruter.
Fristen for å søkje midlar er 15. september.