Tilskot til hurtigladeinfrastruktur for elektriske køyretøy og tunge køyretøy 2025

Vestland fylkeskommune har som mål at klima og miljø skal vere premiss for samfunnsutvikling. Fylkeskommune skal vere ein pådrivar for klimaomstilling og nullutslepp innan 2030. Vestland fylkeskommune skal samstundes utvikle fysisk og digital infrastruktur som sikrar mobilitet. Elektrifisering av bilparken er eitt av satsingsområda for å nå måla om klimaomstilling.

Nytt av året er at det òg vert lyst ut midlar til ladeinfrastruktur for tunge køyretøy.

Målet med utlysinga

Fylkeskommunen tilbyr investeringsstønad til deg som vil etablere offentleg tilgjengelege hurtigladeplassar for elektriske køyretøy og tunge køyretøy. Ordninga skal gjere det mogleg å bygge ut hurtigladeplassar på stader der utbygging ikkje kan skje på kommersielt grunnlag aleine, samt bidra til berekraftig verdiskaping.

Vestland fylkeskommune har sett av 3.390.000 til stønadsmidlar til ladeinfrastruktur til elektriske køyretøy, og kr 5.000.000 til tunge køyretøy for 2025.

I 2025 skal prioriteringa for hurtiglading for elektriske køyretøy vere å betre dekning i distrikta, spesielt i nordlege delen av Vestland. Det er framleis eit hovudfokus å løyse utfordringar for drosjenæringa. Lokasjonar som er spesielt aktuelle er Stad – ytre delar, Bremanger - spesielt ytre del, samt Strandebarm og Skånevik.

I 2025 skal prioriteringa av infrastruktur for tunge køyretøy vere i områda rundt innfartsårene til byane og sentrale strekningar for å sikre berekraftig verdiskaping. Desse skal ikkje konkurrere med Enova sine prioriterte strekningar. Lokasjonar som er spesielt aktuelle er Nordheimsund/Kvam, Mongstad og Øygarden. Samt rundt dei grøne hubane i Vestland.

Sjå utgreiing til Utvalsmøte PS 42/2025.

Vestland har òg andre ordningar knytt til ladeinfrastruktur: Heimelading av drosjer i tidlegare Sogn og fjordane, Tilskot til heimeladar for drosje - Vestland fylkeskommune. Samt til reiselivsdestinasjonar, Tilskot til normalladarar ved reiselivsdestinasjonar i Vestland - Vestland fylkeskommune

Kven kan søkje?

I hovudsak er det kommunar og private hurtigladeoperatørar som kan søkje.

Hurtigladeoperatøren skal vere eit lovleg etablert føretak. Føretaket må ha tilstrekkeleg finansiell styrke til å kunne etablere og drifte hurtigladetilbod. Vestland fylkeskommune tar atterhald om å krevje dokumentasjon på desse minimumskrava i søknadsdialogen. Relevant dokumentasjon vil vere attest for skatt og meirverdiavgift, firmaattest og leverandøren sitt årsrekneskap, inkludert noter med styre- og revisjons melding frå dei to siste åra.

Søkjar kan samarbeide med til dømes andre ladeoperatørar, kommunar, eigedomsforvaltarar, helseføretak, handels- og serviceverksemder, og kraftselskap i prosjektet. Det er òg ynskjeleg med speiselag, der ladeoperatøren får finansiering frå andre eksterne aktørar for å utbetre ladetilbodet utover det denne ordninga gjev rom for åleine. Døme på dette kan vere tilskot eller anna frå kommunar eller Merkur-programmet. Merkur-programmet gjeld spesifikt for Merkur-butikkane i distrikta.

Meir om utlysinga

Midla skal gå til etablering av nye, samt styrking av eksisterande ladeplassar, som ikkje kan byggast ut på kommersielt grunnlag åleine. Ladeinfrastruktur til tunge køyretøy skal ikkje ikkje konkurrere med Enova sine prioriterte strekningar.

Tilskot skal vere avgjerande for at prosjektet kan realiserast. Dette betyr at prosjekt som allereie er vedtatt gjennomført, montert eller sett i gang, vert ikkje støtta. 

Utlysinga skal bidra til å oppnå måla i fylket sin hurtigladestrategi og strategi for ladeinfrastruktur for tunge køyretøy i Vestland.

Fylkeskommunen kan gje lovleg stønad til einskildføretak for å realisere samfunnsnyttige tiltak som ikkje kan gjerast på kommersielt grunnlag åleine. Nokre ladeoperatørar oppgraderer ladeplassane sine med betre ladeutstyr på kommersielt grunnlag. Fylkeskommunen kan difor ikkje gje tilskot til oppgradering av eksisterande ladeplassar i umiddelbar nærleik til slike ladeplassar. Det gjerast unntak for ladeplassar som ikkje vil påverke konkurransen negativt, eller som gagnar drosjenæringa i vesentleg grad.