Søk om støtte til forprosjekt

FORREGION Vestland gir støtte til innleiande forskings- og utviklingsprosjekt (FoU-prosjekt). Ordninga er retta mot bedrifter i Vestland fylke som har lite eller inga erfaring med forsking, og som ønskjer å ta i bruk forsking som verkemiddel i innovasjonsarbeidet.

Forprosjekta skal vere i ein tidleg fase og ha som mål å avklare problemstillingar, moglegheiter og behov for vidare forsking i samarbeid med forskingsmiljø. Prosjekta skal leggje grunnlag for vidare FoU-aktivitet og eventuelt større forskingsprosjekt finansiert av Forskingsrådet eller EU sitt forskings- og innovasjonsprogram Horisont Europa.

Prosjektideen må ha som mål å utvikle ein innovasjon som kan bidra til berekraftig verdiskaping, grøn konkurransekraft eller klimaomstilling i Vestland.

Forprosjekta kan få inntil 200 000 kroner i støtte. Søknader blir behandla fortløpande.

Kven kan søke?

Bedrifter i Vestland fylke kan søke om støtte til forprosjekt. For å få tilskot må bedrifta:

  • Samarbeide med minst éin godkjend forskingsorganisasjon

  • Ha ein ambisjon om at forprosjektet skal føre til vidare arbeid med forsking

Alle søkarar skal ha dialog med ein kompetansemeklar i søknadsprosessen. Dette er ei gratis rettleiingsteneste som skal sikre god kvalitet på søknaden og at alle formelle krav er oppfylte.

Kompetansemeklarane kan:

  • Hjelpe med å identifisere og konkretisere tema og problemstillingar

  • Gi råd om prosjektutforming, budsjettering og formelle krav

  • Bidra til å etablere kontakt med relevante forskingsmiljø

Så mykje kan bedrifter få i støtte

  • Bedrifter kan søke om inntil 200 000 kroner i støtte til forprosjekt

  • Maksimal støttegrad er 70 prosent av godkjente prosjektkostnader, i tråd med statsstøtteregelverket

  • Minimum 70 prosent av støttebeløpet skal gå til kjøp av tenester frå ein godkjend forskingsorganisasjon

  • Bedrifta må bidra med minst 30 prosent eigenfinansiering

Forprosjektet skal gjennomførast i samarbeid mellom bedrifta og minst éin godkjend forskingsorganisasjon, og ha ein varigheit på 4–12 månader.

 

Industriell forsking eller eksperimentell utvikling? 

Prosjektet må bidra enten til industriell forsking eller eksperimentell utvikling i tråd med definisjonane til Forskingsrådet. 

  • Industriell forsking: Handlar om å etablere ny kunnskap eller ferdigheiter for å utvikle nye eller forbetra produkt, prosessar eller tenester. 
  • Eksperimentell utvikling: Handlar om å nytte eksisterande kunnskap på nye måtar eller på nye område for å utvikle nye eller forbetra produkt, prosessar eller tenester. 

Klassifiseringa har innverknad på kor mykje støtte ei bedrift kan få. Industriell forsking kan få meir støtte enn eksperimentell utvikling. 

Kompetansemeklaren kan gi nærare informasjon om krava til søknaden, og hjelpe bedrifta i arbeidet med å etablere prosjektet i tråd med gjeldande reglar. 

Kva kan midlane brukast til? 

Følgjande kostnader kan inngå i prosjektet: 

  • personalkostnader og indirekte kostnader hos bedrifta 
  • innkjøp av FoU-tenester frå godkjende forskingsorganisasjonar 
  • andre driftskostnader knytte til prosjektet

Korleis søker du? 

Søknaden sendes inn gjennom søknadsportalen til Forskingsrådet. Kompetansemeklaren kan gi nærare rettleiing i søknadsprosessen.