Systematisk folkehelsearbeid i Vestland 2026–2036

Ei ny regional satsing for kommunane

Vestland fylkeskommune har starta ei ny, langsiktig satsing for å støtte kommunane i fylket med folkehelsearbeidet: Systematisk folkehelsearbeid i Vestland 2026–2036. Satsinga er vedteken av fylkesutvalet, og all kommunane i Vestland er inviterte til å delta.  

Kva handlar satsinga om?

Kommunane har eit lovpålagt ansvar for å fremje innbyggjarane si helse og livskvalitet gjennom lokal utvikling, planlegging og tenesteyting. Nasjonale evalueringar viser at det er krevjande å skape god samanheng mellom oversiktsarbeid, plan, tiltak og evaluering. 

Målet med satsinga er å gjere det enklare for kommunane å byggje gode system for dette arbeidet, tilpassa lokale behov og ressursar. Satsinga byggjer vidare på erfaringane frå det nasjonale Program for folkehelsearbeid i kommunane (2017-2027), og frå tilsynet på folkehelsearbeidet i kommunane i 2024/2025.

Satsinga inneber ingen nye oppgåver eller store krav om rapportering. Satsinga skal støtte kommunane sitt arbeid med å oppnå føremålet med folkehelselova, gjennom rettleiing, læringsnettverk og samarbeid, ikkje som eit ekstra prosjekt eller tiltak.

Kva får kommunane gjennom å delta?

• Samarbeid og erfaringsdeling med andre kommunar og relevante aktørar i Vestland
• Fagleg rettleiing og støtte til metode og verktøy
• Årleg utviklingstilskot til å gjennomføre satsinga i kommunen

For mindre kommunar gjev dette tilgang til kompetanse og støtte som kan vere krevjande å byggje opp åleine. For større kommunar gjev satsinga moglegheit for regional samordning og vidareutvikling av eigne system.

Utviklingstilskot

Kommunar som inngår partnarskapsavtale, får eit årleg utviklingstilskot for å gjennomføre satsinga. Tilskotet føreset årlege budsjettvedtak i fylkeskommunen, og at kommunen bidreg med tilsvarande innsats i form av arbeidstid og kompetanse.

Korleis kan kommunen delta?

Kommunane kan delta ved å inngå ein partnarskapsavtale med Vestland fylkeskommune. I løpet av hausten 2026 får alle kommunar i Vestland får ein formell invitasjon med meir informasjon, partnarskapsavtale og frist for politisk handsaming.

Har du spørsmål? Ta kontakt med oss!