Eitt samla tannhelsemiljø skal gi fleire pasientar raskare hjelp
Fleire behandlingsrom, fleire spesialistar og tettare samarbeid skal gi auka kapasitet og betre tilgang til tannhelsehjelp i Vestland.
Planen er å samle fleire delar av den offentlege tannhelsetenesta i eit bygg på 3700 kvadratmeter, fordelt på fem etasjar. Her skal TkVestland, Solheimsviken tannklinikk med tannlegevakt og Viken tannklinikk halde til. Ombygginga skal etter planen starte i februar 2027, med innflytting i andre kvartal 2028.
– All honnør til dykk for at de byggjer kapasitet for framtida, sa helse- og omsorgsminister Jan Christian Vestre då han besøkte lokala i Solheimsviken tysdag.
Fleire behandlingsrom skal møte auka behov
I dag held TkVestland til i ulike bygg i Årstadveien. Mangel på behandlingsrom avgrensar kor mange pasientar tannhelsetenesta kan ta imot. Ved spesialistklinikken er det store kapasitetsutfordringar, samtidig som talet på tilvisingar og prioriterte pasientar har auka.
Spesialistklinikken skal utvide frå 10 til 17 behandlingsrom og får i tillegg to operasjonsrom med narkosetilbod. Samlokaliseringa skal også gi plass til fleire spesialistar og betre utnytting av både lokale og personell.
Når spesialistklinikk, forsking og andre tannhelsetenester blir samla under same tak, kan det leggje til rette for sterkare fagmiljø og tettare samarbeid på tvers av tannhelsetenesta.
– Dette er ein betydeleg kapasitetsauke. Med eit samlokalisert TkVestland kan vi i større grad sikre befolkninga på Vestlandet tilgang til spesialisttannhelsetenester, seier Mette Fauskanger, fylkestannhelsesjef i Vestland fylkeskommune.
Lange ventetider for studentar
Etterspurnaden etter offentleg tannhelsehjelp har auka dei siste åra. Unge vaksne frå 19 til og med 28 år betalar 25 prosent av fastsette takstar for nødvendig tannbehandling i den offentlege tannhelsetenesta. Det har gjort tilbodet meir tilgjengeleg for fleire unge. Mange studentar har rett på behandling gjennom Vestland tannhelseteneste, og enkelte stader har ventetida kome opp i eitt år. Samstundes aukar talet på tilvisingar til spesialistklinikkane, og fleire prioriterte pasientgrupper har behov for behandling.
Med fleire pasientar og fleire tilvisingar er målet å auke kapasiteten og sikre at fleire får behandling innan rimeleg tid.
– Denne samlokaliseringa og utvidinga er eit stort løft for den offentlege tannhelsetenesta. Ho vil auke kapasiteten og bidra til kortare ventetider. Vi vil òg sjå på moglegheita for å tilby meir behandling på ettermiddags- og kveldstid. Det kan bidra til å redusere ventetidene ytterlegare, seier fylkesvaraordførar Stian Davies.
Vil sikre dei mest sårbare pasientane
Tonje Hauge Lundin, konstituert områdeleiar i TkVestland, er oppteken av at utbygginga også skal kome dei mest sårbare pasientane til gode.
– Dei som har størst behov for tannhelsehjelp, er ikkje alltid dei som får det. Vi må sikre at sårbare grupper får eit godt og likeverdig tannhelsetilbod, uavhengig av livssituasjon og føresetnader. Det krev sterke fagmiljø, spesialistkompetanse og forsking, seier ho.
Ny tannhelsereform på høyring
Måndag la regjeringa fram forslag til ei ny tannhelsereform på høyring, eit arbeid helseministeren også trekte fram under omvisinga i Solheimsviken. Han understreka at det ikkje finst noko fasitsvar på kva tannhelsetenesta skal prioritere, og oppmoda fagmiljøa til å delta i debatten og sende inn høyringssvar.
Høyringsfristen er 19. januar 2027, og målet er å leggje fram forslag for Stortinget i løpet av 2027.
Les høyringa om forslag til ny lov om fylkeskommunale tannhelsetenester
