Det største fylkesvegprosjektet i Vestland no: Ytre Steinsund bru tek form
Frå søyle til søyle ute i havgapet støyper fylkeskommunen metervis med bru så lenge vêret held no i vinter. Med over 300 meter allereie støypt og god framdrift er planen at fastlandsforbindelsen til Ytre Sula kjem på plass i løpet av året.
– Det som gjer prosjektet blant holmar og skjer ekstra spesielt er å oppleve kor mykje denne brua betyr for folk som bur her ute. Gleda over å kunne bytte ut ferje med bru er stor, og det gir arbeidet vårt ein heilt eigen dimensjon, seier prosjektleiar Helge Jostein Follevåg i avdeling for infrastruktur og veg i Vestland fylkeskommune.
Brubyggarane har opplevd det meste av vêr, frå sterke stormar med orkan i kasta til sommardagar med blank sjø og steikande sol. Året 2026 starta med vinterstormar på rekke og rad.
Kor langt er de komne og kva driv de med no i januar?
– Per veke 5 har vi støypt 313 løpemeter bru av totalt 811 meter, det betyr at 498 meter står att. No i januar er det full fart med seks fritt frambygg-vogner. Frå kvar av brusøylene ute i sundet blir det for tida støypt seksjonar på 5 meter til kvar side av søyla før ein flyttar fram vognene for ny støyp. Dette gir ein produksjon på om lag 20-25 løpemeter bru per veke, seier Helge Jostein Follevåg.
– Vi monterer og to hjelpetårn som skal stive av konstruksjonen og ta opp trykk og strekk fram til vi har fått heile brua samankopla. Dei blir tatt ned etter samankopling. Akkurat no er konstruksjonen på sitt mest kritiske, og veldig utsett for vêr og vind, jordskjelv og ytre tilhøve.
Kva er mest moro og vellukka med prosjektet?
– Det er utruleg spennande å få vere med på å bygge ein så stor konstruksjon heilt ute i havgapet. Det er kjekt å sjå at alt fungerer rundt oss. Vi har ein dyktig totalentreprenør i Skanska, og eg er heldig som har flinke kollegaer i fylkeskommunen som samarbeider godt. Og da tenker eg ikkje berre her i byggefasen men også på planlegging, utgreiing og konstruksjon. No jobbar vi firedagarsveke med kontorrigg på Solneset i Solund, og når vi deler både kontor og bustad blir vi nesten som ein liten familie. Og vi har fantastiske naturopplevingar ute på jobb!
Kva er mest utfordrande?
– Vêr og vind er utan tvil den største utfordringa for oss. Når stormane herjar, blir det krevjande å halde produksjonen oppe, også fordi HMS alltid står i første rekke. Med så mange som jobbar i stor høgde, der konsekvensane av ei ulukke kan vere fatale, er tryggleiken til arbeidarane noko vi har heilt fremst i tankane. Det har vore dagar der vinden har vore så kraftig at det rett og slett ikkje er forsvarleg å jobbe ute i sundet. I tillegg må vi ta omsyn til tryggleiken når mannskap skal transporterast ut til brusøylene.
Korleis er framdrifta?
– Framdrifta er god, og vi ligg an til å kunne opne brua 20. november. Første samankopling er planlagt i mai, medan den siste er i august. Men vi er sårbare for vêr og vind. Spesielt vind er utfordrande då det set tårnkranene ut av spel ved ein gitt vindstyrke, noko som stoppar all støypeaktivitet. Men vi står på alt vi kan når vêret er godt!
