ViteMeir får 1 million til ny utstilling
Vestland fylkeskommune løyver 1 million kroner til utvikling av berekraftutstillinga «Naturlege byggesteinar» på vitensenteret ViteMeir på Kaupanger i Sogndal. Målgruppa er barn og unge i regionen.
– Vitensentra er fantastiske formidlarar av kunnskap, spesielt til born og unge. Denne utstillinga gir viktig kunnskap om berekraft og plastproblematikk, slik at vi forstår både utfordringane vi står, i og kva løysingar som finst. Dette prosjektet er godt forankra i regionale satsingar knytt til berekraft, sirkulær økonomi og kompetanseutvikling, seier fylkesordførar Jon Askeland.
Vedtaket vart gjort i fylkesutvalet 28. april.
No kan utviklingsarbeidet starte
– Endeleg! Vi har jobba med finansiering av dette prosjektet i to år, så no gler vi oss til å starte på den kjekkaste delen: å utvikle interaktive installasjonar og praktiske læringsopplegg! Det seier Gry Høyheim, dagleg leiar i ViteMeir, om støtta.
– Tusen takk til Vestland fylkeskommune som ser verdien av å utvikle installasjonar og læringsopplegg innan berekraftig materialbruk og alternativ til plast, og som støttar opp om utviklingsarbeidet til ViteMeir. Som regionalt vitensenter er vidareutvikling av utstillingane ei kjerneoppgåve for oss, og noko vi er heilt avhengige av for å halde oss relevante og aktuelle. Økonomisk drahjelp er ein føresetnad for å få dette til, seier Høyheim.
Opning i 2027
Utstillinga skal vere ei interaktiv satsing med tilhøyrande læringsopplegg, og tek for seg berekraftig materialbruk og biobaserte alternativ. Tilskotet skal gå til utvikling og realisering av utstillinga i perioden 2026–2027, med planlagd opning i 2027.
Dette skal utviklast
Prosjektet Naturlege byggesteinar omfattar utvikling av:
- Interaktive installasjonar som viser eigenskapar, moglegheiter og bruksområde for nedbrytbare og biobaserte materialar.
- Læringsopplegg for skuleelevar, med vekt på innovasjonsmetodikk, mellom anna gjennom bruk av Design Thinking, og arbeid med framtidsretta materialløysingar.
Skal nå elevar i heile regionen
Det er planlagt å gjere delar av utstillinga og læringsopplegget mobilt, slik at tilbodet også kan nå elevar i heile ansvarsområdet til ViteMeir.
Prosjektet er forankra i samarbeid med fleire regionale aktørar, mellom anna Høgskulen på Vestlandet, Bioregion Institute og SIMAS, som skal bidra med fagleg kvalitetssikring og relevant kompetanse innan materialteknologi, økologi og avfallshandtering.
Forankra i utviklingsplan for Vestland
Prosjektet er godt forankra i Utviklingsplan for Vestland 2024–2028, mellom anna innan berekraft, sirkulær økonomi og kompetanseutvikling. Læringsopplegga er også tett kopla til gjeldande læreplanar og støttar målet om å styrke realfagsinteresse og kompetanse innan område som er viktige for det grøne skiftet og framtidig arbeidsliv.
Samla kostnadsramme på 2,5 millionar
Samla kostnadsramme for prosjektet er 2,5 millionar kroner. I tillegg til tilskotet frå Vestland fylkeskommune er det allereie innvilga midlar frå Sparebankstiftinga Sogn og Fjordane og Luster Sparebank.