No kan kommunar i Vestland søkje om midlar til betre mobildekning

Hovudutval for næring vedtok 25. august å lyse ut tilskotsmidlar til betre mobildekning i område som manglar tilfredsstillande dekning. Samla er det sett av 54,8 millionar kroner i tilskot, som skal fordelast mellom denne ordninga og den etablerte ordninga for breibandutbygging.

 

– Vi har alt gjort mykje for breibandsutbygginga i Vestland. No skal vi gjere meir for å byggje ut mobilnettet. Der er framleis utfordringar i Vestland fylke, og midlane er eit viktig steg for å styrke mobildekninga i Vestland. Vi prioriterer områda der behovet er størst, mellom anna langs viktige ferdselsårer, og der betre dekning betyr mest for busetnad, næring og beredskap, seier Sigrid Brattabø Handegard, leiar for hovudutval for næring i Vestland fylkeskommune.

 

Det er kommunane som melder inn prosjekt på vegne av utbyggjarar. Prosjekta må vere i område som i dag manglar mobildekning, eller berre har dekning med eldre 2G-teknologi. Etter utbygging må området ha minimum 4G eller 5G.

 

Søknadsfrist er 9. oktober 2026.

 

Prosjekta vert vurderte etter tre kriterium. Måloppnåing er vekta tyngst med 50 prosent, og handlar om kor viktig ferdselsåra er, kva næring og busetnad som finst i området, og kva betre dekning vil bety for beredskap og trygg ferdsel. Kostnadseffektivitet er vekta 30 prosent, medan lokal medfinansiering frå kommune eller private tel 20 prosent.

 

Fylkeskommunen understrekar at årets utlysing truleg berre vil gje rom for nokre få pilotprosjekt, sidan ordninga er heilt ny og tidsfristane frå staten er knappe. Prosjekt som ikkje når opp i år, vert ikkje avvist, men lagt inn i ei oversikt over behov som det skal jobbast vidare med. Kva område som kvalifiserer for støtte, er i stor grad avgjort av nasjonale dekningskart og kriterium fastsett av Nasjonal kommunikasjonsmyndigheit (Nkom), ikkje av fylkeskommunen sjølv.

 

Samstundes opnar vi for utvida søknadsfrist til same dato (9. oktober) på tilskotsordninga til breibandutbygging i fylket.

Ordninga skal sikre hustandar og verksemder gigabitdekning der det ikkje er kommersielt lønsamt å bygge ut.

Hovudutvalet vil få ei ny sak om prioritering og fordeling av midlar mellom dei to ordningane hausten 2026.

Til meir informasjon og søknadsskjema: