Ni forskingsprosjekt får 4,4 millionar kroner til innovasjon i Vestland

Hovudutval for næring i Vestland fylkeskommune vedtok 11. februar 2026 å løyve 8 millionar kroner til ordninga Forskingsfinansiering Vestland. Ordninga finansierer tidlegfase forprosjekt i næringslivet og skal bidra til meir forskings- og innovasjonsaktivitet i fylket.

Det kom inn 17 søknader innan fristen 15. mai. Ni prosjekt har no fått støtte på til saman 4, 355 millionar kroner. Om lag 4 millionar kroner står att i ordninga og skal lysast ut i ei ny søknadsrunde seinare i år.

– Vestland har mange bedrifter med gode idéar og stort innovasjonspotensial. Med denne ordninga ønskjer vi å senke terskelen for å ta i bruk forsking tidleg i utviklingsløpet, slik at fleire prosjekt kan vekse vidare og utløyse større forskings- og innovasjonssatsingar seinare, seier Jone Engelsvold, forskingskoordinator i Vestland fylkeskommune.

Frå plast til ull i taredyrking

Arctic Seaweed i Øygarden får 500 000 kroner i støtte frå Vestland fylkeskommune til å utforske innovative løysingar for taredyrking. Selskapet arbeider med å erstatte tradisjonelle plastvekstliner med biologisk nedbrytbare vekstliner av ull – eit tiltak som kan gjere ei allereie miljøvenleg næring endå meir berekraftig. Samstundes kan ulla sine naturlege eigenskapar bidra til høgare avlingar.

– Vi har ein klar ambisjon om å utvikle skalerbar teknologi for framtidas taredyrking. Innføringa av miljøvenlege vekstliner er eit viktig steg i den retninga. Med støtte frå Vestland fylkeskommune ønskjer vi å bidra til reell miljøgevinst og ei meir berekraftig framtid – både for næringa og for planeten, seier Stefan Post, Cultivation Manager i Arctic Seaweed.

Drone- og sensorteknologi i bærproduksjon

Njøs frukt- og bærsenter på Leikanger er tildelt 465 000 kroner til eit prosjekt som skal ta i bruk drone- og sensorteknologi.

– Vi er svært glade for støtta frå Vestland fylkeskommune. Midlane gjer at vi kan ta i bruk drone- og sensorteknologi i arbeidet med å utvikle robuste frukt- og bærsortar tilpassa norsk klima. Med slik teknologi kan vi hente inn meir og raskare informasjon om plantane enn ved manuell registrering. Det er kunnskap som er gull verd når vi skal få fram sortar for eit meir miljøvenleg landbruk. Prosjektet styrkjer også rolla vår som nasjonalt senter. og som ein attraktiv samarbeidspartnar for næringa, seier Liv Gilpin, dagleg leiar ved Njøs frukt- og bærsenter.

Rakfisk med lågare klimaavtrykk

Osland Havbruk AS i Bjordal i Høyanger kommune er tildelt 500 000 kroner til eit forskingsprosjekt som skal undersøkje om regnbogeaure frå sjøoppdrett i Sogn kan nyttast til produksjon av rakfisk med same kvalitet som tradisjonell ferskvassørret. Prosjektet skal kartleggje korleis vasskvalitet, mikroflora og fermentering påverkar smak og kvalitet, og utvikle kunnskap som kan bidra til meir berekraftig og kortreist produksjon av rakfisk med lågare klimaavtrykk.

– Vi er svært glade for å få støtte til dette prosjektet. Målet er å finne ut om regnbogeaure frå Sognefjorden kan bli eit nytt norsk råstoff for rakfisk av høg kvalitet. Det kan gi nye moglegheiter for norsk oppdrettsnæring og eit meir berekraftig grunnlag for vidare vekst i rakfiskproduksjonen. Saman med rakfiskprodusenten Wangensten AS i Valdres og forskingsinstituttet Nofima skal vi byggje kunnskap som kan opne for auka bruk av norske råvarer i rakfiskproduksjonen, skape nye verdiar og bidra til ei meir berekraftig verdikjede, seier Erik Osland i Osland Havbruk. 

Desse prosjekta fekk støtte

• KURTALA GREEN AMMONIA AS – Oksy-forbrenning av ammoniakk for varmegjenvinning i Haber–Bosch-prosessen: Undersøker om oksygen frå alkalisk elektrolyse kan nyttast direkte i oxy-fuel-forbrenning og styrkje grunnlaget for tekno-økonomiske vurderingar i småskala hydrogen- og ammoniakkanlegg – 500 000 kr
• Lysverket AS – Gastronomisk kvalitet for prisdifferensiering: Etablerer eit empirisk grunnlag for å identifisere, dokumentere og prise kvalitetsskilnader i lokal sjømat frå kystfiskarar i Vestland til gastronomirestaurantar – 390 000 kr
• Metodos AS – RØR-RESP: Dokumenterer korleis kald-side termisk respons frå éin PBB-test kan nyttast som lastgrunnlag for kvalifisering av ulike røyr- og prosesskomponentar – 500 000 kr
• Arctic Seaweed AS – UllTareTau: Undersøker moglegheitene for å bruke ulltau i staden for plasttau i taredyrking og samanliknar etablering og vekst med ulike såmetodar og såtidspunkt – 500 000 kr
• Njøs frukt- og bærsenter AS – Dronebasert deteksjon av vinterherdigheit og plantehelse i jordbær: Undersøker korleis dronar kan gi nyttige data om jordbærplanter og utviklar eit brukargrensesnitt for enkel datainnsamling og analyse – 465 000 kr
• Havdis AS – Industrial validation of PDRN extraction from cod milt at 1-tonne pilot scale: Forskar på PDRN-ekstraksjon frå torskemjølke i pilotskala for å dokumentere prosessrobustheit, produktkvalitet og grunnlag for kommersiell oppskalering  – 500 000 kr
• Stadt Towing Tank AS – Stadt OceanLAB – Testsenter: Utviklar eit forskings- og testlabkonsept der næringsliv og forskingsmiljø kan samarbeide om å utvikle, teste og verifisere nye løysingar innan maritim sektor, havenergi og akvakultur – 500 000 kr
• Eupnea AS – Robustheit i kontinuerleg respirasjonsmåling med RespX sensor under fysisk aktivitet: Undersøker om ein brystmontert RespX-sensor kan måle respirasjon påliteleg under fysisk aktivitet – 500 000 kr
• Osland Havbruk AS – Regnbueørret frå Sognefjorden som råstoff for tradisjonell norsk rakfisk: Undersøker om sjøoppdretta regnbogeaure frå Sogn kan brukast til rakfisk med same kvalitet som tradisjonell ferskvassørret – 500 000 kr

  

Les meir om ordninga: Utlysing av forprosjekt - Forskingsfinansiering Vestland - Vestland fylkeskommune