Gir nye namn på haldeplassar i fem kommunar

Fylkesutvalet behandlar kvart år ei sak med tilråding til nye haldeplassnamn. I årets sak har fylkesadministrasjonen gått gjennom Språkrådet sine tilrådingar til nye haldeplassnamn i kommunane Lærdal, Øygarden, Gulen, Gloppen og Vik.

– Stadnamn ber med seg kultur- og naturhistorie, og gjennom ei årleg behandling i fylkesutvalet sikrar vi både heilskap og lokal forankring. Tilrådingane frå Språkrådet gir eit godt fagleg grunnlag, og det er viktig for oss at ønska frå kommunane blir høyrde i prosessen, seier fylkesordførar Jon Askeland.

Skal heve kvaliteten 

Det var Språkrådet som tok initiativ til gjennomgang av eksisterande namn. I 2021 blei Vestland fylkeskommune, Kartverket og Språkrådet samde om at Språkrådet skulle gå gjennom haldeplassnamn i fylket. Arbeidet blei sett i gang for å heve kvaliteten på namna og sikre at dei følgjer lova om stadnamn og faglege prinsipp. Klarare og meir korrekte namn gjer det enklare for reisande å finne fram og tek samstundes vare på lokal kultur- og stadnamntradisjon. Dette skal og vere med å sikre ein heilskapleg tilnærming til haldeplassnamn i heile landet.

Ikkje gjort tidlegare

Språkrådet har til no kome tilrådingar for til saman 13 kommunar. Fylkeskommunen arbeider systematisk med å gjennomgå desse. I 2025 vart første sak lagt fram, der 176 haldeplassar i tre kommunar fekk nye namn. Årets sak med namneendringar i fem kommunar er den andre i rekka. Saka viser også endringar Skyss har gjort i løpet av 2025 på haldeplassar der det har vore nødvendig for å sikre tilbodet til brukarane. 

I arbeidet med å finne nye namn har Språkrådet henta inn høyringsinnspel frå kommunane på vegner av fylkeskommunen. Ein tilsvarande systematisk gjennomgang av haldeplassnamn i Vestland har ikkje tidlegare vore gjort.

Sjå namneendringane

Borgund hyttesenter blir Voldum, Alvheim blir Heggøyvegen og Berge nord blir Bergstunet. Vil du vite meir? Les heile den politiske saka PS 16/2026. Du finn dokument som viser namneendringane som vedlegg til saka.

Merk! Fylkesutvalet vedtok at stoppa Sviggum og Sviggum i Lærdal ikkje skal endre namn, slik det står i vedlegg 1.