Fylkestinget justerer budsjettet for 2026
Vestland fylkeskommune får 315 millionar kroner meir frå staten. Mykje av pengane skal gå til å styrke kollektivsektoren.
Fylkestinget vedtok budsjettet for 2026 i desember 2025. Det samla fylkesbudsjettet var då på rundt 18 milliardar kroner. Etter det vedtok Stortinget statsbudsjettet, og budsjettavtalen førte til at Vestland fylkeskommune fekk 315 millionar kroner meir enn det som låg til grunn. Fylkestinget vedtok difor 24. mars eit revidert budsjett.
– Den auka løyvinga gir oss rom til å styrke viktige område i fylket. Midlane blir brukte til å sikre gratis ferjer, styrkje kollektivtilbodet og prioritere opplæring og folkehelse. Det bidreg til betre tenester og meir føreseielege rammer for innbyggjarane i Vestland, seier fylkesordførar Jon Askeland.
Gratis ferje og kollektivtiltak
Ein del av ekstraløyvinga er tidlegare øyremerkte tilskot, som no er lagt inn i dei frie inntektene. Det er også løyvd midlar for å kompensere for at enkelte ferjestrekningar framleis skal vere gratis. Fylkestinget set av 65 mill. kr til dette.
12 mill. kr går til kollektiv- og mobilitetstiltak. Av dette går 5 mill. til kapasitetstiltak i byvekstavtaleområdet (Bergen og omeign), 2 mill. til auka helgetilbod i Bergen, 2 mill. til rutetiltak i distrikta, 1 mill. til bybusstilbod i Førde og 2 mill. til pendlartilbod i Førde og Sogndal.
Pengedryss til Fjordstream 2026
Fylkestinget løyvde på tampen av tingseta 600 000 kr til Fjordsteam 2026 frå disposisjonsfondet. Fylkestinget oppmodar festivalen om å søkje driftstilskot frå tilskotsordninga «tilskot til kultur og folkehelse» for framtida
Fleire læreplassar
Fylkestinget set også av pengar til blant anna fleire læreplassar (57,3 mill.), rettleiing av nye lærarar (5,3 mill.) og til folkehelsearbeid i kommunane (9,6 mill.).
Avsetjing til fond
77 millionar blir sett av til fond for tiltak innan kollektiv, medan 46 mill. blir sett av til fond som rassikringsmidlar.